भांगरभूंय | प्रतिनिधी
दक्षीण गोंयांत सांस्कृतीक कार्यावळींनी वाड जावंक जाय : राजेंद्र तालक
मडगांव, प्रतिनिधी: दक्षीण गोंयांत सांस्कृतीक कार्यावळींनी वाड जावपाची गरज आसा. ताका लागून मडगांवच्या रवींद्र भवनान विवीध उपक्रम चालीक लायल्यात. सध्या फिल्म क्लब निर्मितीची प्रक्रिया सुरु आसा. नोव्हेंबर मेरेन दोन सिनेमा दाखोवपाचो विचार आसा. रवींद्र भवन कलाकार क्लब आनी काव्य मैफील सुरु करतले, अशी म्हायती अध्यक्ष राजेंद्र तालक हांणी दिली. ते विवीध उपक्रमां विशीं म्हायती दिताले.
रवींद्र भवनाच्या कार्यकारिणीचे आदीं जाल्ले बसकेंत फिल्म क्लब सुरु करपाचेर चर्चा जाली. ती प्रक्रिया सुरु जाल्या. ऑक्टोबर आनी नोव्हेंबरांत पंदरा दिसांच्या काळांत एकदां सिनेमा दाखोवपाचो विचार आसा. रवींद्र भवना वतीन गणेश मुर्ती तयार करपाची कार्यशाळा जाली, घुमट वादन कार्यशाळा घेतात. उपरांत गोकुळाष्टम मनयतले. फॅन्सी ड्रेस आनी डान्स सर्त आयोजीत केल्या. भुरग्यांक विवीध कला सादर करपा खातीर उर्बा दितात. ताका लागून तांचे मदीं सादरीकरणाचो आशिल्लो भंय उणो जाता, अशें तांणी सांगलें.
हाचे भायर रवींद्र भवन कलाकार क्लब तयार करपाचोय निर्णय घेतला. दरेका वांगड्याक १०० रुपया फी दवरल्या. पूण वांगडी कलाकार आसचो, अशी अट आसा. तांणी रवींद्र भवनाच्या कॅन्टीनांत मेज बूक करचें आनी सुमार आठ जाणांची बसका घेवपा खातीर म्हत्वाची सुवात उपलब्ध करून दितले. ह्यो बसका सांस्कृतीक कार्यावळींच्या संबंदांत आसल्यारूच परवानगी दितले. धर्म आनी राजकारणा संबंदीत बसका करपाक मेळची ना, अशेंय तालक हांणी सांगलें.
काव्य मैफील सुरू करपाचो विचार आसा. दर म्हयन्याक सांजवेळार हिंदी, इंग्लीश, मराठी, कोंकणी अशा विवीध भाशांच्या कवीं खातीर कविता मेळावो सुरू जातलो. कविता कशी बरोवची, तिची शैली आनी हेर म्हायतीय दितले. चर्चाय जातली. गोंयां सयत राज्या भायल्या कवींकय आपयतले.
प्रोजेक्टर, स्क्रीन, आवाज बदलपाची गरज आसा. १ ते ३० नोव्हेंबर मेरेन सभाघर पुरायपणान बंद आसतलें. हे संबंदी आमदार दिगंबर कामत आनी मुख्यमंत्री डॉ. प्रमोद सावंत हांचे बसके उपरांत निर्णय घेतले. पोरण्या तंत्रगिन्यानांत बदल करून नव्या तंत्रगिन्यानाचो वापर जातलो, अशीय म्हायती तालक हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
