भांगरभूंय | प्रतिनिधी
भावंडांनो,
कशी वता तुमची सुटी? सुटी कशे तरेन घालोवची हाचें तुमी वेवस्थीतरितीन नियोजन केलां न्हय? शाब्बास! अशीच तुमची सुटी बरे तरेन घालोवन खूब कितें गिन्यान मेळोवपाचो यत्न करात हां… तुमकां सगळ्यांक येस आवंडेतां.
तर भावंडांनो, ह्या सप्तकांत आमी याद काडुया रेड क्रॉस संस्थेची.
तर भावंडांनो, सदां तुमकां हांव आमच्या इतिहासांतल्या म्हान अज्रंवर मनशां संबंदी वळख आनी वावर सांगतालों. आयज मात हांव तुमकां एके संस्थेची वळख आनी कार्य सांगूंक सोदतां. ती संस्था आसा रॅड क्रॉस.
भावंडांनो, रेड क्रॉस ही समाजाची सेवा करपी अशी संस्था आसा जी झुजांत जखमी जाल्ल्या जवानांचो, सैनिकांचो जी वाटावपा खातीर तळमळीन वावुरता. इतलेंच न्हय तर भुंयकांप, चक्री वादळ वा रानाक उजो लागता तेन्ना अशे तरेच्या सैमीक संकश्टांत मजती खातीर धांवून. येवपी ही संस्था. हेन्री ड्युनांट हो हे संस्थेचो संस्थापक. ही संस्था उबी करपाक कारण कितें घडलें तें तुमी जाणात? सांगतां.
भावंडांनो, 1859 वर्सा सोल्फेटिनाचें झुंज जालें. हें झुंज हेन्री ड्युंनांट हाणें आपल्या दोळ्यांनी पळयलें. ह्या झुंजांत पन्नास हजारां वयर सैनिक मेले. इतलेंच न्हय तर झुंजा मळार खाणा-जेवणा बगर, जखमी जवान उपचारां बगर कशे तळमळटाल, रक्ता-मांसांचो कसो चिखल सो जाल्लो तें ताणे उक्त्या दोळ्यांनी पळयल्लें. तें पळोवनच हेन्रीक तांचे सेवेचें पिशें लागलें. लोक ताका पिशेच म्हण्टोले. हेन्री ड्युनांटान झुंजा मळार जखमी जवानांचे हाल पळयल्ले. ते ताणे सुवेनियर ऑफ सोल्फे रिनो नांवाच्या पुस्तक रुपान जगामुखार हाडले. येरोपांत तें पुस्तक गाजलें. तें पुस्तक वाचून झुंजा मळार राष्ट्रसंपतीचें कशें लुकसाण जाता तें लोकांक कळ्ळें. 1864 वर्सा जेनेवा परिशदेंत हो मुद्दो खूब गाजलो आनी तेच वेळार झुंजांत जखमी जावपी वा दुयेत पडपी जवानांची सेवा करपा खातीर आपवावुरपी दळां उबारचीं अशें सगळ्या राष्ट्रांनी एकमतान थारायलें. ड्युरांटाच्या ह्या वावराक संवसारभर नामना मेळ्ळीं. संवसारीक भावपण, मनीसपणाचो धर्म आनी राष्ट्रनिरपेक्ष सेवा हांचे प्रतीक म्हूण धव्या फांटभुंयेचेर तांबडी फुली हें रेड क्रॉसाचें चिन्न थारलें. जगाच्या फांचीर खंयीय, केन्नाय मजती खातीर धांवून वचपी संघटना जाय म्हणपी हेन्रीचें सपन पुर्णत्वाक आयलें. हे संस्थेचो रूख व्हडव्हड जायत गेलो. तीस वर्सानीं सेवेची दखल घेवन तांकां नेबेल पुरस्कार फावो केलो.
1920 वर्सा रेड क्रॉस ची संस्था स्थापन जाली. आमच्या देशांतलो म्हापूर आनी भारत-पाक मजगतच्या झुंजावेळार रेड क्रॉसान भोव मोलादीक सेवा दिली. संस्थेचे पुराय संवसारांत पावणे दोनशे फांटे आसात जाल्यार तिशेक कोटी वांगडीसेवेंत राबतात. तीन वेळां नोबेल पुरस्कार मेळोवपी रेड क्रॉस ही एकोडी संस्था आसा.
भावंडांनो, भारतांत 1920 वर्सा रॅड क्रॉसाची स्थापना जाली. हेन्री ड्युरांट हांचो 8मेक वाडदीस. तांचो वाडदीस आंतरराष्ट्रीय रेड क्रॉस दीस म्हूण पुराय संवसारभर पाळटात. मनशाक मनशाची गरज आसता हो संदेश ही संस्था दिता. देखून भावंडांनो, ते निमतान 8 मेक तांची याद काडून हो संदेश भोंवतणी पसरायत आमी आमचे परीन मनीसपणाचो धर्म जागयत फुडें सुरया हां. याद उरतली तुमकां? बरें तर,… उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
