भांगरभूंय | प्रतिनिधी
पणजी:प्रतिनिधी: पर्वरेच्या तॉमास स्टीवन्स कोंकणी केंद्र आनी अक्षरपथ- गोवा हांच्या जोडपालवान शेनवार 2 सप्टेंबराक पर्वरे सभाघरांत कोंकणी कविता लेखनाचेर कार्यशाळा जातली. तातूंत गोंय, कारवार आनी मुंबयचे वट्ट 23 कवी वांटेकार जातले. ही कार्यशाळा फाकिवंत भाशा विज्ञानीक प्रो. किरण बुडकुले हांच्या मार्गदर्शना खाला जातली. तांकां प्राध्यापक डॉ. पालिया पंडीत आनी डॉ. तन्वी बांबोळकार पालव करतलीं.
कार्यशाळेचो विशय ‘प्रेरणेच्या मुळा सावन कवितेच्या फळा मेरेन कवीचो आप सोद’ असो आसतलो. हातूंत वांटेकार जावप्यांक कविता हे प्रेरक तांकीचो आपल्याच अंतर्मनांत सोद घेवपाक मेळचो; तशेंच स्वताचे आनी हेरांचेय कवितेचो सांगातान आस्वाद घेतनाच आपले पुरतो आपलेच कवितेचा कस लावपाक मेळचो, हो हे कार्यशाळेचा उद्देश आसा.
कवितेचें स्वरूप, लक्षणां, भास, तंत्र वा छंद हांचे विशींचे दुबाव आसले वा सरसकट कविते विशीं जावं आपलेच कविते विशीं उपस्थितांच्या मनांत हुस्के आसले, जाल्यार ते परस्पर चर्चा वा प्रस्न आनी जापो हांचे वरवीं सुटावे करचे, असोय प्रामाणीक यत्न हे कार्यशाळेंत जातलो; अशें केंद्राचे संचालक डॉ. पांडुरंग फळदेसाय हांणी कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
