पार्शेंची बिंदिया गवंडी साकारता गणपतीच्यो मुर्ती

भांगरभूंय | प्रतिनिधी

चित्रशाळेंत वर्साक 180 ते 200 तयार करता मुर्ती

पेडणें: बायल म्हणले उपरांत चार वणटी आड रावन आपलें घर सांबाळप इतलेंच तिचें काम आशिल्लें. पूण हें चित्र पुसून उडयत आयची बायल विवीध पांवडे हुपत आसा. हातूंत चिकनमातये पसून आतां मेरेन हजारांनी गणपती तयार करपी पार्शें पेडणेंची बिंदिया भानुदास गवंडी हांचो उल्लेख करचोच पडटलो.

गणपतीच्या चित्रशाळांनी चडशे दादलेच काम करतना दिसतात. पूण पार्श्यां गवंडीवाड्यार बिंदिया भानुदास गवंडी हांणी आयज मेरेन हजारांनी गणपतीच्यो मुर्ती तयार केल्यात. फक्त चिकणमातयेचो वापर करून मूर्त करीत आसतना घर संवसाराक तांणी हातभार लेगीत लायला. हस्त कलाकारां खातीर सरकार वेळावेळार वेगळ्योवेगळ्यो येवजण्यो राबयत आसता. अश्यो येवजण्यो दरेक कलाकारा मेरेन पावतल्यो हाची कोण खात्री दिवंक शकना. तरी लेगीत आपल्याक सरकारी येवजणेचो लाव मेळ्ळो ना म्हणून ते आपले काम सोडिनात.

बिंदिया हांचें लग्न जाले उपरांत तिणें आपल्या मांवा कडल्यान मूर्त कशी तयार करप? चिकणमातयेक कसो आकार दिवप हें शिकून घेतलें. आयज ती दरवर्सा 180 ते 200 मेरेन गणपतीच्यो मुर्ती करपा बरोबरूच मुर्तींक आकर्शक रंगकाम दिवपाचें लेगीत काम करता. तांचो घरकार भानुदास हे लेगीत फाटल्या 40 वर्सां सावन हें काम करीत आसात. बापायची परंपरा चल्यान सांबाळ्ळी. चल्याची परंपरा घरकान्न आनी आतां भुरगीं सांबाळटात. पयले पिळगे कडल्यान दुसरे, दुसरे पिळगे कडल्यान तिसरे पिळगे कडेन कला दिवपाचें हें कार्य चालूच आसा. भानुदास गवंडी हे सरकारी नोकरेंत आसून लेगीत कले कडेन आडनदर करिनात. नाट्य मळारूय तांणी योगदान दिलां. तांचे चित्रशाळेंत एकूय प्लास्टर ऑफ पॅरिसाची मूर्त सांपडची ना.

हालीं हस्तकला म्हामंडळान अशा कलाकारांक चिकणमातयेचो वापर करून चडांत चड मुर्ती करपा खातीर यंत्रणा उपलब्ध करून दिल्यात. सरकारान ह्या कलाकारांक सुविधा उपलब्ध करून दिवच्यो अशी मागणी बिंदिया गवंडी करतात.

घरांतली एक बायल शिकली जाल्यार पुराय कुटुंब तिगतलें असो समज आनी प्रवाह आयजूय सुरू आसा. तेच पद्दतीन घरांत एखादो कलाकार निर्माण जायत जाल्यार तो हेरांक उर्बा दिता. ते पद्दतीन बिंदिया गवंडी हांणी आपल्या घरकारा कडल्यान मेळिल्ली कला आपल्या भुरग्यांकूय दिवपाचें काम करीत आशिल्ल्याचें हे चित्रशाळेंतल्यान दिसून येता.