iPhone 15 बेगीनूच लॉंच
भांगरभूंय | प्रतिनिधी
Apple ही एक व्हडली तंत्रगिन्यान कंपनी. iPhone १५ हो अंदूंचो सगळ्यांत चड वाट पळोवपी स्मार्टफोन. मंगळारा ऍपलान आपले वर्सुकी आयफोन कार्यावळीक आमंत्रणां धाडल्यांत. १२ सप्टेंबराक कंपनीच्या क्युपर्टिनो, कॅलिफोर्निया हांगच्या मुख्यालयांत ही कार्यावळ जातली. धाडिल्ल्या आमंत्रणांत ह्या इव्हेंटाक Wonderlust अशें नांव दिलां. तशेंच निळ्या आनी भांगराळ्या रंगांत Apple चो लोगो ह्या आमंत्रणां दिसता.
कंपनीन दिल्ल्या आमंत्रणांत खंयचीं उत्पादनां बाजारांत हाडटले असो स्पश्ट उल्लेख ना. पूण Apple सकाळीं १० वरांचेर (भारतीय वेळार प्रमाण रातचीं १०.३० वरां) सुरू जावपी कार्यावळींत आपली फुडले पिळगेची आयफोन १५ सिरीज लॉंच करपाची शक्यताय आसा.
ही वर्सुकी कार्यावळ जंय सुरू जातली थंय कंपनी आपले नवे प्रॉडक्ट्स म्हळ्यार iPhones तशेंच Apple Watch सादर करतात. अंदूंय हांगा व्हड इव्हेंट जातलो. कंपनीचें लक्ष नव्यान आयफोनांचेर केंद्रीत आसतलें. अंदूं नवे चार मॉडेल लॉन्च जावपाची अपेक्षा आसा. जातूंत आयफोन १५ मॉडेल आनी दोन हाय एन्ड आयफोन १५ प्रो व्हेरिएंटचो आस्पाव आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
