भांगरभूंय | प्रतिनिधी
फोंडें, प्रतिनिधी : गॅस सिलिंडराचें मोल २०० रुपया उणें केलां, ही बरी गजाल. पूण हें सरकार फकत लोकांक फटोवपी सरकार हें लोकांनी लक्षांत दवरचें. वेंचणूक लागीं पाविल्ल्यान हे दर उणें केल्यात. वेंचणूक जाले उपरांत मोल दुपेट जातलें, असो दावो खासदार फ्रांसिस सार्दीन हांणी केलो.
दक्षीण गोंय जिल्लो कॉंग्रेस कार्यालयांत पत्रकार परिशदेंत खासदार फ्रांसीस सार्दीन हांणी सरकाराक लक्ष्य केलें.
लोकांक रेल्वे दोट्टीकरण नाका तरी केंद्र आनी राज्य सरकारान तें लोकांचेर लादतात. रेल्वे दोट्टीकरणाचें काम फुडाराच्या सोयी खातीर आसलें तरी तें लोकांच्या इत्से आड जावचें न्हय. लोकांच्या घरांची वाट लावन आनी दायज थळा धोक्यांत घालून लोकांक अशी उदरगत नाका. देखून माजोर्डा आनी वास्को मजगतींच्या रेल्वे दोट्टीकरणांक विरोध आशिल्ल्याचो सरकारान थाराव घेवचो, अशी मागणी सार्दीन हांणी केल्या.
चंद्रयान ३ च्या येसा खातीर शास्त्रज्ञांक परबीं दितना सार्दीन हांणी हें येस फुडाराक नवे पिळगे खातीर आदर्श थारतलें, अशें सांगलें.
डेंग्यूचे दुयेंती वाडत आसात. हाचेर बेगोबेग कारवाय जाय. राज्यांतल्या जायत्या बस स्टेशनांची स्थिती सामकीच बाबत जाल्या. ती सुदारपाचो यत्न राज्य सरकारान करचो. बांदकाम खात्यान रस्त्या वयल्या फोंडकुलां कडेन लक्ष दिवन रस्ते दुरुस्त करचे. सोरो पियेवन गाडी चलोवपी वाहन चालकांक लागून बरेच अपघात घडटात. ते खातीर येरादारी पुलिसांनी पिवपी, वेगान गाडी चलोवपी आनी नेम पाळनाशिल्ल्यांचेर कारवाय करची. शेतकी अनुदान अजूनय सगळ्या शेतकारांक मेळूंक ना. शेतकी अधिकार्यांनी हाची दखल घेवन उरिल्ल्या शेतकारांक अनुदान दिवचें. संजीवनी साकर कारखानो बंद करचो न्हय, ऊस शेतकारांक तांच्या पिकाचे पयशे दिवचे. सरकारान शेतकारांचें कल्याण करपाची गरज आसा. केंद्रांतली खंयचीय संस्था कितेंय चूक करता जाल्यार खासदार म्हणून तें आपल्याक सांगचें, अशें खासदार सार्दीन हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
