रक्षाबंधन केन्ना? बुधवार काय बिरेस्तारा?
भांगरभूंय | प्रतिनिधी
श्रावण सुरू जातकच लोक रक्षाबंधनाची वाट पळोवंक लागतात. सुताचे पुनवे दिसा राखयेचो हो पवीत्र उत्सव मनयतात. राखयेच्या उत्सवाक फकत १ दीस उरला. राखयेची लोकप्रियता बाजारांतूय दिसपाक लागल्या. भावाच्या हाताचेर बांदपाक भयणी आपल्या भावा खातीर आवडीच्यो राखी वेंचून काडटात. पूण, रक्षाबंधन परब अंदूं केन्ना मनोवची असो प्रस्न लोकांक पडला. कांय जाणां म्हणटात बुधवारा म्हळ्यार ३० ऑगस्टाक! जाल्यार थोडे म्हणटात, ३१ ऑगस्ट!!
हे विशीं ज्योतिषी सांगतात, ३० ऑगस्टाक पूनव आशिल्ल्यान राखी बांदपा खातीर सकाळीं ९.०१ ते रातचीं १२ हो शुभ काळ जावन आसा. हो पुराय दीस भद्राचो जावन आसा. ताका लागून राखी बांदपाचो शुभ म्हुर्त रातच्या ९ वरां उपरांत जावन आसा. रक्षाबंधनाची परब ९ वरां सावन रातच्या १२ वरां मेरेन मनोवपाक मेळटा. सगल्या पंडितांच्या म्हणण्या प्रमाण राखी बांदपा खातीर ३१ ऑगस्ट होवूय शुभ म्हूर्त आसा.
बिरेस्तार, ३१ ऑगस्टाक सकाळीं भयणींक राखी बांदपाक सामको उणो वेळ मेळटलो. ह्या दिसा राखी बांदपाक सकाळीं ७ वरां मेरेन शूभ म्हुर्त आसा. ताका लागून सकाळीं राखी बांदप शक्य जावचें ना. देखून ३० ऑगस्टाक रातचें राखी बांदप बरें. अशें म्हणटात, ३१ ऑगस्टाक राखी बांदपाक जर शुभ म्हुर्त चुकलो जाल्यार तें अशूभ आसूं येता, असो कांय पंडितांचो दावो. ताका लागून भयणींनी भावाक शुभ म्हुर्ताचेर राखी बांदची. मात, दुसरे वटेन नातें, भावना हाका म्हत्व दिवपी भाव- भयणी आपणाक आनी भावाक फावता त्या वेळाचेर पवित्र मनांत राखी बांदतात. शुभ, अशुभाचो तीं हुस्को करीनात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
