भांगरभूंय | प्रतिनिधी
डेटींग अॅपा वरवीं चलयो सादताल्यो संपर्क
कळंगूट, कोलवाळ पुलिसांची जोड कामगिरी
म्हापशें: डेटींग अॅपा वरवीं दादल्यां कडेन संपर्क सादून, तांकां आपोवन आनी बलात्काराची कागाळ पुलिशेंत दिवपाची धमकी दिवन संबंदितां कडल्यान लाखांनी रुपयांची खंडणी मागपी तिगां जाणांचे टोळयेक कळंगूट पुलिसांनी अटक केल्या.
कागाळदार किरण पटेल (गुजरात) हाचे कागाळीच्या आदारान पुलिसांनी 23 वर्सां पिरायेच्या दोन चलयां सयत विश्वदीप गोहील (रा. भावनगर-गुजरात) हाका अटक केल्या. अशे तरेन दुबावीत चलयांनी गोंयांत अजून दोन जाल्यार गुजरातांत खूबशा लोकांची लुबाडणूक केल्या.
पुलिसांनी दिल्ले म्हायती प्रमाण दुबावीत चलयो डेटींग अॅपा वरवीं खूबशा दादल्यां कडेन संपर्क सादून तांचे कडेन मोबायलाचेर चॅटींग करताल्यो. तांची योग्य म्हायती घेताल्यो. एखादो गिरेस्त मनीस मेळत जाल्यार ताका त्यो डेटी खातीर आपयतल्यो आनी उपरांत संबंदितां कडेन 2 ते 10 लाखा मेरेन व्हड रक्कम मागताल्यो. जर पयशे दिले नात जाल्यार पुलिशेंत बलात्काराची कागाळ नोंद करून सदर गुन्यांवा खाला अटक करपाची धमकी लेगीत दुबावीत चलयो दिताल्यो. हो खंडणीचो वेव्हार करपा खातीर दुबावीत तरणाट्यो विश्वदीप गोहील ह्या आपल्या वांगड्याक बराबर घेतल्यो.
कागाळदार किरण पटेल हो फाटल्या 21 ऑगस्टाक गोंयांत आयिल्लो. तो दुबावीत चलयांक मेळ्ळो. उपरांत दुबावितांनी ताका धमकी दिवपाक सुरवात केली. निमाणें हें प्रकरण दोन दिसांनी म्हणल्यार 23, 24 ऑगस्टाक कळंगूट पुलिशेंत आयलें. पुलीस स्टेशनार येतकूच कागाळदार दुबावितांनी 2 लाख रुपया दिवन हें प्रकरण आपले भितर मिटयलें. ताका लागून दुबावीत चलयांनी ताचेर पुलिशेंत कागाळ नोंद केली ना.
कांय दिसा उपरांत कागाळदाराक दुबावीत चलयो बनावटगिरी करून दादल्यांक लुबाडत आशिल्ल्याचें समजलें. अजून तांचे कडल्यान कोणूच दादलो तांच्या गळाक लागचो न्हय म्हूण तो कागाळ दिवपाक मुखार आयलो आनी ताणें सोमारा 28 वेर सकाळीं कळंगूट पुलीस स्टेशनार रितसर कागाळ नोंद केली.
ह्या कागाळीच्या आदारान पुलिसांनी तिनूय दुबावितां आड भादंसंच्या 386 आनी 120 ब खाला गुन्यांव नोंद केला. ह्या गुन्यांवा खाला तिनूय दुबावितांक पुलिसांनी धरून रितसर अटक केली.
दुबावितांनी पणजी महिला पुलिशेंतूय अशेच तरेच्या बलात्काराच्या कागाळी प्रमाण पुलिसांनी एका मनशा आड गुन्यांव नोंद केला. तशेंच ह्या प्रकरणांत न्यायालयांत आरोपपत्रूय दाखल केलां. हालींच कोलवाळ पुलीस स्टेशनाचे शिमेंत असोच धमकी दिवन खंडणीच्या माध्यमांतल्यान लुबाडणुकीचो प्रकार दुबावितां कडल्यान घडिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
