शेंकड्यांनी उमेदवार, अखेरेक मुलाखती रद्द
भांगरभूंय | प्रतिनिधी
पणजी, प्रतिनिधी : पर्वरेच्या मनीसबळ उदरगत म्हामंडळाच्या कार्यालयांत आयज बरीच गर्दी पळोवपाक मेळ्ळी. म्हामंडळान (जीएचआरडीसी) सोमारा आयोजीत केल्ल्या 300 एमटीएस, 50 चालक आनी 20 स्टेनोग्राफर पदांचे मुलाखतीं खातीर ही गर्दी जाल्ली. वाडत वचपी गर्दी पळोवन म्हामंडळान ह्यो मुलाखती रद्द केल्यो.
सध्या राज्यांत शेंकड्यांनी शिक्षीत तरणाटे घरा बेकार आसात. हाची नोंद घेवन तरणाट्यांक नोकरी दिवपाचें काम ‘जीएचआरडीसी’ फाटल्या कांय वर्सां सावन करता. दर वर्सा म्हामंडळा वरवीं शेंकड्यांनी तरणाट्यांक अश्यो नोकर्यो दितात. ताका लागून बेरोजगारीचेर नियंत्रण मेळोवपाक सरकाराक शक्य जालां.
म्हामंडळान सोमारा उमेदवारांक पर्वरे हाजीर रावपाक सांगिल्लें. ते प्रमाण उमेदवारांनी कार्यालयांत गर्दी केल्ली. इतल्या उमेदवारांची मुलाखत घेवप शक्य नाशिल्ल्यान सोमाराच्यो मुलाखती रद्द केल्यात. सोमारा हाजीर आशिल्ल्या सगळ्या उमेदवारांचे संपर्क क्रमांक म्हामंडळान घेतल्या. पात्र उमेदवारांक टप्प्याटप्प्यान मुलाखती खातीर आपयतले अशें म्हामंडळाचे वेवस्थापकीय संचालक दशरथ रेडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
