भांगरभूंय | प्रतिनिधी
मडगांव, प्रतिनिधी : मडगांवच्या उदरगतीच्या कामां संबंदी आमदार दिगंबर कामत हांणी बसका घेतली. हातूंत मुख्याधिकारी, अभियंते आनी हेर कर्मचार्यांचो आस्पाव आसलो. पूण, आपल्याक मात हे बसकेक आपोवंक ना. इतलो निश्ठावंत आसून लेगीत आपल्याक भायरायलो. हाचें मनाक दुख्ख जाल्ल्यान आपणें हें पद सोडपाचो निर्णय घेतिल्लो. पूण आमदारा कडेन जाल्ले बसके उपरांत हे सगळे गैरसमज पयस जाले. सगळें विसरून काम करपाचो सल्लो आमदारान दिलो, अशें मडगांवचे नगराध्यक्ष दामोदर शिरोडकार हांणी सांगलें.
दोन दिसांच्या नाटकी घडणुकां उपरांत मडगांवचे नगराध्यक्ष दामोदर शिरोडकार मडगांव पालिका कार्यालयांत आयले.
आपले आनी फुडार्यां मदीं आशिल्ले मतभेद सध्या सोंपल्यात. आपूण फुडें नगराध्यक्ष म्हणून काम करीत रावतलों अशें शिरोडकार हांणी पत्रकारां कडेन उलयतना सांगलें.
शेनवारा मडगांवच्या एका हॉटेलांत आमदार कामत हांणी बसका घेतिल्ली. तेन्ना मुख्याधिकारी, अभियंते आनी हेर कर्मचारी हाजीर आशिल्ले. तेन्ना आपूण एका नगरसेवका सयत जेवपाक गेल्लों. तेन्ना कर्मचार्यांचे फोन मिटींगेक येता काय ना हें विचारपाक येताले. तेन्ना आपल्याक ही बसका आशिल्ल्याचें कळ्ळें. उपरांत मुख्याधिकार्यांनी प्रसारमाध्यमांक बसकेक कांय निर्णय जाल्ल्याचें सांगिल्लें. दुसर्या प्रभागांतल्या कामांचे पळोवणे खातीर आपूण आमदारा सयत आशिल्लों. मडगांवच्या उदरगतीच्या कामांची चर्चा करतना नगराध्यक्ष म्हणून आपल्याक आपोवंक ना. ही गजाल आपल्याक खटकली आनी खूब दुख्ख जालें. ताका लागून नगराध्यक्षपद सोडपाचो निर्णय जाहीर केल्लो.
आपल्याक दुख्ख जाल्ल्याचें दुख्ख आपणें आयतारा आमदार दिगंबर कामत हांचे वांगडा जाल्ले बसके वेळार मांडलें. फाटल्या 26 वर्सां सावन प्रामाणिकपणान आमदार कामत हांचे वांगडा आसा. निश्ठेन काम करप्याचे निश्ठेक धक्को बसल्यार बरेच त्रास जातात, अशें तांणी फुडें म्हणलें. आमदार कामत हांणी, शेनवारचे बसके विशीं संवादांत कांय उणाव जाल्ल्यान बसकेक आपोवंक ना. तेन्ना राग उक्तावन आपूण नगराध्यक्षपद सोेडपाचें जाहीर केलें. पूण हें सगळें विसरून कामाक लागुया अशें तांणी स्पश्ट केलें.
मुख्याधिकार्यां कडेन कसलेच तरेचे मतभेद नात. कांय जाण मुख्याधिकारी गौरीश शंखवाळकार आनी आपले मदीं मतभेद आसात अशें म्हणटात. पूण मुख्याधिकारी शंखवाळकार हे खूब बरे मनीस. तांचे कडेन आपले कसलेच मतभेद नात. ते बरे अधिकारी जावन आसा अशें नगराध्यक्ष शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
