भांगरभूंय | प्रतिनिधी
बंगळुरू, खबरां संस्था : चांद्रयान 3 चे येसस्वी मोहिमे उपरांत प्रधानमंत्री नरेंद्र मोदी हांणी आपलो विदेशी दौरो सोंपोवन वेळ काडिनासतना बंगळुरूक वचून तांणी इस्रोच्या शास्त्रज्ञांची तोखणाय केली. उपरांत आयतारा इस्रोचे मुखेली एस. सोमनाथ हांणी तिरुवनंतपुरम हांगा वचून भद्रकाली देवीचें दर्शन घेतलें. आपूण देवळांत कित्याक वता हेंय तांणी सांगलें.
एस. सोमनाथ हांणी, आपूण शास्त्रज्ञ आनी नवेनवे सोद घेवप हें आपलें काम. आपूण चंद्रा विशीं सोद घेतां तसोच अध्यात्माचोय सोद घेतां. नव्या नव्या गजालींचो सोद घेवप आपल्याक आवडटा. मागीर ते विज्ञान आसूं वा अध्यात्म. ह्याच कारणाक लागून आपूण देवळांनीय वतां आनी धर्मग्रंथूय वाचतां. जसो आपल्या ब्रह्मांडाचो सोद घेवप गरजेचें तशेंच आपल्या अस्तित्वाचोय सोद घेवप गरजजेचें. देवळां हीं आमचे मुळावे संस्कृतायेचो एक वांटो जावन आसा. ब्रह्मांडात कितें लिपलां हाचो सोद घेवपाक शास्त्रीय प्रयोग गरजेचो. तशेंच आत्मो शांत जावपा खातीर देवळांनी येवप गरजेचें, अशेंय तांणी सांगलें.
‘शिवशक्ती’ नांव दिवन कितें चूक केल्या?
चांद्रयान 3 च्या टचडावन पॉयंटाक शिवशक्ती नांव दिलां हें चुकीचें न्हय. शिवशक्ती आनी तिरंगो हीं दोनूय नांवां भारतीय. प्रधानमंत्री नरेंद्र मोदी हांणी ताचो अर्थूय सांगला. आमी जें करतात ताचें एक म्हत्व आसा. तें आसपाकूय जाय. तशेंच देशाचे प्रधानमंत्री जाल्ल्यान टचडावन पॉयंटाक नांव दिवप हो तांची विशेश अधिकार जावन आसा. शिवशक्ती ह्या नांवांत कांयच वायट ना.
चांद्रयान 3 येसस्वी जाल्या उपरांत आतां विक्रम लँडर आनी प्रज्ञान रोव्हर हीं उत्कृश्ठ काम करतात. पांचूय उपकरणां सुरू आसात. थंयच्यान मेळपी म्हायती ही आमचे खातीर म्हत्वाची जावन आसा. 3 सप्टेंबर मेरेन आमकां ही म्हायती मेळपाक शकता अशेंय सोमनाथ हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
