भांगरभूंय | प्रतिनिधी
कंपनीक जाय ते प्रमाण सरकार नाचचो ना : पर्यटन मंत्री
पणजी : सनबर्नाचें थळ तशेंच हेर गजाली विशीं मुख्यमंत्री डॉ. प्रमोद सावंत हांचे कडेन चर्चा करून निर्णय जातलो. कंपनीच्या तालार सरकार नाचचो ना, अशें पर्यटन मंत्री रोहन खंवटे हांणी स्पश्ट केलां.
फाटलीं बरींच वर्सां सनबर्न महोत्सव वागातोरा जाता. सनबर्न महोत्सवाचें मोपा विमानतळा लागीं स्थलांतरण करपाचो प्रस्ताव कंपनीन उलोवन दाखयला. हाका लागून एक नवो वाद तयार जाला. हे फांटभुयेर पर्यटन मंत्री रोहन खंवटे हांणी हे उलोवप केलां.
वागातोर सावन सनबर्न मोपा स्थलांतरीत करपाक आमदार मायकल लोबो हांणी विरोध केला. मायकल लोबो सयत शिवोलेच्यो आमदार डिलायला लोबो हांणी लेगीत सनबर्न मोपा व्हरपाक विरोध केला.
सनबर्न कंपनीन फाटले वर्सा गोंयच्या कलाकारां खातीर माची उपलब्ध करून दिवपाचें आस्वासन दिल्लें. तरी लेगीत गोंयच्या कलाकारां खातीर कंपनीन माची उपलब्ध करपाचे आस्वासन पुराय केलें ना. आतां कंपनीच मोपा सनबर्न आयोजीत करपाचो प्रस्ताव उक्तायता. कंपनीक जाय तसो निर्णय गोंय सरकार घेवचें ना. सरकाराच्या अटींचे पालन कंपनीक करचेंच पडटलें. मुख्यमंत्री डॉ. प्रमोद सावंत हांचे कडेन हांव ह्या विशयाचेर उलयतलों. तेच निमाणो निर्णय घेतले, अशें पर्यटन मंत्री रोहन खंवटे हांणी सांगलें.
मोपा विमानतळा लागीं सनबर्न महोत्सव आयोजीत करपाक विरोध जावपाक लागला. आयतारा चोपडें पंचायतीचे ग्रामसभेंत सनबर्नाक विरोध जालो. पेडणें म्हालाची संस्कृताय तशेंच दायजाची जतनाय जावपाक जाय. पार्टी म्हणले की किदें जाता तें सगल्यांक खबर आसा. हाका लागून सनबर्ना सारखे प्रकार पेडणें म्हालांत जावपाक फावो ना, अशी मागणी ग्रामसभेंत जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
