आयआयटी प्रकल्प सांग्यारूच

भांगरभूंय | प्रतिनिधी

गोंय सरकाराचो निर्णय; आयआयटी पंगड फुडल्या 15 दिसांत सुवातांची करतलो पळोवणी

पणजी: जमीन प्रस्नाक लागून खूबशा वर्सां सावन रखडिल्लो आयआयटी प्रकल्प सांग्यारूच उबारपाचो निर्णय गोंय सरकारान घेतला. ते खातीर सद्या सांग्यार तीन सुवातो निश्चीत केल्यात. आयआयटीचो पंगड फुडल्या 15 दिसां भितर येवन ह्या सुवातांची पळोवणी करतलो.

कांय म्हयन्यां पयलीं गोंय सरकारान कोठार्ली-सांग्यार सरकारी सुवातेंत आयआयटी प्रकल्प उबरपाचें निश्चीत केल्लें. उपरांत आयआयटीन सुवातेची पळोवणी केले उपरांत सायट सर्वे पुराय केलो. त्या वेळार थळाव्या लोकांनी खर विरोध केल्लो. पूण पुलीस संरक्षणांत सर्वेक्षणाचें काम पुराय केलें. उपरांतच्या काळांतूय कोठार्लींतल्या नागरिकांनी आयआयटीचो विरोध कायम दवरलो. ते खातीर आंदोलनां केलीं. हें वातावरण कायम आसतनाच केंद्रीय शिक्षण मंत्रालयान कोठार्लीच्या नागरिकांक पत्र धाडून कोठार्लीतली जमीन तळपांची तशेंच उणीं आशिल्ल्यान ती आयआयटी खातीर योग्य नाशिल्ल्यान ते जमनीर प्रकल्प उबारचे नात अशें स्पश्ट केल्लें.

ताका लागून आयआयटी सांग्यार जावची ना असो दुबाव निर्माण जाल्लो आसतनाच ह्या प्रकल्पा खातीर सुरवाते सावन आग्रही राविल्ले थळावे आमदार आनी मंत्री सुभाष फळदेसाय हांणी सांगें मतदारसंघांतल्यो तीन सुवातो सरकाराचे नदरेक हाडून दिवन प्रकल्प सांग्यारूच उबारपाचो निश्चेव कायम दवरला.

मजगतीं, गोंयाक आयआयटीची मान्यताय मेळून 8 वर्सां जाल्यांत. सद्या फर्मागुडयेर अभियांत्रिकी म्हाविद्यालयांत आयआयटीचे कॅम्पस सुरू आसात. आयआयटी कॅम्पसा खातीर सगल्यांत पयलीं काणकोणचो विचार केल्लो. पूण थंयच्या शेतकारांनी आंदोलन केल्ल्यान आयआयटी काणकोण सावन सांग्यार उबारपाचो निर्णय जालो. सांग्यारूय त्या वेळार आयआयटी विरोधांत आंदोलनां सुरू जाल्ल्यान सत्तरींतली शेळ-मेळावली ही सुवात निश्चीत केली. शेळ-मेळावली हांगा जमनीचें सर्वेक्षण करून आराखडोय तयार केलो. पूण थळाव्या लोकांनी प्रकल्पाक विरोध करून खूबशे दीस खर आंदोलन केलें. ताका लागून सरकाराक फाटीं सरचें पडलें. आतां सरकारान परतून एकदां आयआयटी खातीर सांगेंचो विचार सुरू केला.

मजगतीं, सद्याचे स्थितींत आयआयटी प्रकल्प सांगें मतदारसंघांतूच उबारपाचेर मुख्यमंत्री डॉ. प्रमोद सावंत ठाम आसात. ताका लागून मंत्री सुभाष फळदेसाय हांणी सुचयिल्ल्यो तिनूय कडेनच्यो सुवातो फुडल्या 15 दिसांत आयआयटी पंगडा कडल्यान सर्वे करतले. तिनां मदली एक सुवात केंद्रीय शिक्षण मंत्रालया कडल्यान मान्यताय मेळटकूच प्रकल्पाचें काम रोखडेंच सुरू करतले. ह्या प्रकल्पाक लागून सुमार दोन हजार थळाव्या तरणाट्यांक रोजगार मेळपा सयत सांगेंचो विकासूय जातलो असो विस्वास मंत्री फळदेसाय सेगीत उक्तायत आसात.

मंत्री सुभाष फळदेसाय हांणी म्हणलें…

– आयआयटी खातीर कोठार्लीची सुवात योग्य नाशिल्ल्याचें पत्र केंद्रीय शिक्षण मंत्रालयान धाडलें उपरांत सांग्यारूच तीन कडेनच्या सुवातांचो पर्याय आपणें सरकाराक दिल्लो. सरकारानूय ते खातीर हकयकार दाखयला.

– आयआयटीचो पंगड फुडल्या 15 दिसांत गोंयांत येवन ह्या सुवातांची पळोवणी करतलो. उपरांत फुडली प्रक्रिया जावन एका सुवातेची निवड जातली. थंय प्रकल्प उबारपाचें काम सुरू जातलें.