भांगरभूंय | प्रतिनिधी
पेडणें, प्रतिनिधी : विधानसभेचे वेंचणुके खातीर फकत पेडणेंच मतदारसंघ आरक्षीत कित्याक? असो प्रस्न चांदेल- हंसापूर ग्रामसभेंत ग्रामस्थांनी हाजीर केल्या उपरांत पेडणें विधानसभा मतदारसंघ आरक्षण मुक्त करचो, असो थाराव एकमतान संजूर केलो.
चांदेल हंसापूर ग्रामसभा सरपंच तुळशीदास गांवस हांचे अध्यक्षतेखाला जाली. ह्या वेळार उपसरपंच रुचिरा रमेश मलीक, पंच प्रजय मळीक, रिमा मळीक, बाळा शेटकार, पंचायत सचीव विलास कानोळकार, गट विकास अधिकारी प्रतिनिधी शाम मिसाळ आनी हेर हाजीर आशिल्ले.
सरपंच तुळशीदास गांवस हांणी सगळ्यांक येवकार दिलोे. जाल्यार पंचायत सचीव विलास कानोळकार हांणी फाटले बसकेचो इतिवृत्तांत वाचून कायम केलो.
विधानसभा पेडणें मतदार संघ आरक्षण रद्द करपाचो थाराव फुडले कारवाये खातीर संबंदीतां कडेन धाडून दितलो अशी म्हायती ह्या वेळार सरपंच तुळशीदास गांवस हांणी दिली. तशेंच गांव प्लास्टीक मुक्त करपा खातीर विंगड विंगड उपक्रम, जनजागृती आनी आपली जी संकल्पना आसा ती तांणी मांडली. चांदेल हंसापूर पंचायत वाठारांतली मुखेल न्हंय, हांगच्या व्हाळांचेर, न्हंयांचेर जे पर्यटक येतात ते हांगा येवन मस्तेपणां करतात. ह्या सुवातांचेर पुरायेन बंदी घालची अशी सुचवणी ग्रामसभेंत केली. ह्यो सुचवण्यो खरपणान पाळपाचेंय ह्या वेळार थारलें.
ह्या वेळार विवीध उदरगतीच्या कामांचेर चर्चा जाली. वीज, उदक, रस्ते अश्या साबार विशयांचेर ग्रामस्थांनी सुचवण्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
