भांगरभूंय | प्रतिनिधी
पणजी, प्रतिनिधी ः म्हालगडे चित्रकार आनी गोंय कला महाविद्यालयाचे निवृत्त प्राध्यापक सद्गुरु चेंदवणकार (75) हांकां शुक्रारा 25 ऑगस्टाक सांजवेळा 4:30 वरांचेर मोंन्त गिरी हांगा मरण आयले. आयज शेनवारा सकाळीं 11.30 वरांचेर मोंत गिरी मसंडभुंयेंत तांचे कुडीचेर निमणे संस्कार जाले. तांचे फाटल्यान घरकान्न, चली विनीता (चित्रकार), निकीता बोंद्रे, जांवय, नातरां असो परिवार आसा.
तांकां दम्याचो दुयेंस आशिल्लें. फाटल्या सप्तकांत तांची स्थिती इबाडिल्ल्यान तांका म्हापशेंच्या हॉस्पिटलांत दाखल करून मंगळारा घरा हाडलो.
मुंबयच्या सर जे जे स्कूल ऑफ आर्ट हांगाच्यान 1972- 73 वर्सा जे डी आर्ट पेंटिंग डिप्लोमा, 1973- 74 वर्सा पदव्युत्तर डिप्लोमा आनी 1972- 75 वर्सा प्रिंट मेकिंग प्रशिक्षण तांणी घेतिल्लें.
1976 ते 84 मेरेन राज्य कला प्रदर्शनांत ताका जायते पुरस्कार मेळ्ळे. तशेंच 1979-81 वर्सा अॅकॅडमी ऑफ फाइन आर्ट अमृतसर, 1981 वर्सा मुंबय आर्ट सोसायटी, 1995 वर्सा ललित कला अकादेमी, 2010 वर्सा एआयएफएसीएस हांचे प्रतिश्ठीत पुरस्कार मेळ्ळे. तीन दशकां गोंय कला महाविद्यालयांत प्राध्यापक आशिल्ले. तांचे सारके मोगाळ, कला शिक्षक दुर्मिळ अशा उतरांनी कला महाविद्यालयाचे निवृत्त प्राचार्य महेश वेंगुर्लेकार हांणी दुख्ख उक्तायलां. चेंदवणकार हे एक प्रतिभाशाली चित्रकार तशेंच प्रिंट मेकिंगांतूय कुशळ आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
