भांगरभूंय | प्रतिनिधी
पणजी, प्रतिनिधी ः गोंय शालांत मंडळान 2023- 24 शिक्षणीक वर्सा सावन नवें शिक्षण धोरण (एनईपी) चालीक लावपा खातीर कांय म्हत्वाचे निर्णय घेतल्यात. दोन सत्रां बदला एक निमाणी परिक्षा आसतली. पूण, आतां मार्चांचे परिक्षे खातीर तयार नाशिल्ल्या विद्यार्थ्यांक जून म्हयन्यांत परिक्षा दिवपाची संद मेळटली. पयलीं हो पर्याय मार्चाचे परिक्षेंत अपेस आयिल्ल्यां खातीर आशिल्लो.
एनसीईआरटीन राष्ट्रीय शिक्षण धोरणा खाला नवो आराखडो तयार केला. तातूंत धावे आनी बारावेची परिक्षा वर्साक दोन फावट घेवपाची तरतूद केल्या. तशेंच इकरावी आनी बारावी वर्गांत दोन भासो सक्तीन शिकपाची तरतूद आसा. तांतूत एक थळावी भास आसप गरजेचें. मजगतीं, गोंय शालांत मंडळान फाटल्या कांय वर्सांत दोन परिक्षा, स म्हयन्यांत एक सत्र परिक्षा आनी मार्च- एप्रिलांत निमाणी परिक्षा घेतली. पूण हो नेम आतां गोंय शालांत मंडळान बदलला.
एनसीईआरटीन दोन परिक्षा आंखल्या तरी गोंयांत फकत एक परिक्षा जातली; पूण मार्चांत परिक्षा दिवपाक तयार नाशिल्ल्या विद्यार्थ्यांक म्हळ्यार अभ्यास करूंक नाशिल्ल्या विद्यार्थ्यांक, हेर कांय कारणांक लागून परिक्षा दिवपाची उरिल्ल्यांक आनी नापास जाल्ल्या विद्यार्थ्यां खातीर जूनांत जावपी परिक्षेक बसपाक मेळटलें.
चालू शिक्षणीक वर्सा शालांत मंडळान दोन म्हत्वाचे बदल करपाचो निर्णय घेतला, ते म्हळ्यार मार्च परिक्षेंत हाजीर नाशिल्ल्यांक जून म्हयन्यांत परिक्षा दिवप आनी गोंय शालांत मंडळ परिक्षेच्या पेपराची काळ अडेज वरां वयल्यान वाडोवन तीन वरां केला.
– भगीरथ शेट्ये, अध्यक्ष, गोवा शालांत मंडळ
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
