भांगरभूंय | प्रतिनिधी
कुंकळ्ळी उद्देगीक वसणुकेंतलो कोयर; पंचाची कारवाय करपाची मागणी
मडगांव: कुंकळ्ळी उद्देगीक वसणुकेंतले एके कंपनींतल्या घातक कोयराची येरादारी करपी ट्रकांतलो कोयर रस्त्यार पडपाची घडणूक बिरेस्तारा रातीं घडली. ह्या कोयराक लागून पांच दुचाकी चालक रस्त्या वयल्यान निसरून पडले. थळावे पंच वांगडी मेलिबा गोम्स हांणी घातक कोयराची येरादारी करतना लोकांची सुरक्षा पळोवची, सरकारान हातूंत लक्ष घालचें अशी मागणी केली.
मेळिल्ले म्हायती प्रमाण कुंकळ्ळी उद्देगीक वसणुकेंतल्यान एके कंपनीच्या घातक कोयराची येरादारी करपी ट्रकांतल्यान शिर्ली धर्मापूर वाठारांत स्पीडब्रेकराचेर कोयर पडलो. दोन सुवातांनी हो कोयर पडिल्लो. हो कोयर रोखडोच उबारूंक नाशिल्ल्यान रस्त्या वयल्यान वचपी पांच दुचाकी चालकाक हाचो फटको बसलो आनी ते रस्त्यार निसरून पडले. थळावे पंच वांगडी मेलिबा गोम्स हांणी घडणूक थळार येवन कंपनीच्या वेवस्थापनाक हाची म्हायती दिली.
गोम्स हांणी सांगलें, लोकांचे फोन आयले उपरांत आपूण रोखडीच घडणूक थळार येतकूच घातक कोयर रस्त्यार पडिल्लो. ट्रक चालकाक आपूण कसले तरेचो कोयर व्हरता हाची म्हायती नाशिल्ली. कंपनीच्या वेवस्थापनाचे कांय मनीस आयले पूण ते ह्या कोयराची जापसालदारकी घेनाशिल्ले. जाल्यार येरादारी करप्यांनी ताची जापसालदारकी घेवंक जाय अशें ते सांगताले. गोंय सरकारान अशे तरेचो कंपनींतलो घातक कोयर येरादारी करतना नेमांक पाळो दितात काय ना हाची चवकशी करपाची गरज आसा. घातक कोयर सुरक्षे बगर येरादारी केल्यार हाचो त्रास लोकांक जावंक शकता अशी शक्यताय तांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
