भांगरभूंय | प्रतिनिधी
कारवायेक येवकार; देड लाखा परस चड रक्कम वसूल
वास्को: वास्को सप्ता फेरींत परवानो नासतना दुकान घालपी कांय दुकानदारां आड मुरगांव पालिकेन काल (शुक्रारा) सांजवेळा कारवाय करतना देड लाखां परस चड रक्कम वसूल केली. हे कारवायेक कांय जाणांनी येवकार दिलो. तशेंच हेर कांय व्हड दुकानदारां आडूय कारवाय जावपाची गरज आशिल्ल्याचें म्हणलें.
वास्को सप्ता फेरींत दुकानां घालचे पयलीं मुरगांव पालिकेचे तिजोरेंत हे सुवाते खातीर सात दिसांची रक्कम तशेंच कोयर उबारपा खातीर एक हजार रुपया भरचे पडटात. ते संबंदी मुरगांव पालिका संबंदितांक तात्पुरते परवाने दिता. पूण कांय दुकानदार ही रक्कम भरिनासतना ऐनवेळार फुटपाथार, रस्तो दुभाजकार बी सुवातांनी आपलो वेवसाय सुरू करतात. ह्या प्रकरणांत कांय जाण तांकां सुवात दिवपा संबंदी फुडाकार घेतना तांचे कडल्यान कांय रक्कम लेगीत घेतात. ताका लागून पालिकेक व्हड प्रमाणांत महसुलाचेर उदक सोडचें पडटा.
हांगासरल्या न्यायलय इमारती मुखा वेल्या फुटपाथार कोणेंच आपलो वेवसाय सुरू करचो न्हय अशें आवाहन दर वर्सा करतात. पूण थंय विक्रेते आपलो वेवसाय करतात. तांचे कडल्यान ते सुवातेचे पयशे कोण घेता हें उक्तें गुपीत आसता.
पूण अंदूं मुरगांव पालिकेन थंयच्या विक्रेत्यांच्या परवान्यांची तपासणी केली तेन्ना तांचे कडेन परवाने नाशिल्ल्याचें उक्तें जाल्ल्यान तांचे कडल्यान रक्कम वसूल केली. ह्या कामांत मुरगांवचे नगराध्यक्ष गिरीश बोरकार, मुख्याधिकारी जयंत तारी, पालिका मार्केट समितीचे अध्यक्ष प्रजय मयेंकार, नगरसेवक नारायण बोरकार, लेखा आनी कर अधिकारी उदय वाडकार तशेंच पालिका निरिक्षक हांणी फुडाकार घेतलो. ताका लागून पालिकेचे तिजोरेंत कांय लाखांची भर पडली. पालिकेन अशा विक्रेत्यांचो सोद घेवन तांचे कडल्यान रक्कम वसूल करीत जाल्यार व्हड रक्कम पालिका तिजोरेंत जमा जातली. तशेंच जे कोण ह्या विक्रेत्यांक जाग्याजाग्यांनी सुवात दिवपा खातीर फुडाकार घेवन पयशे घेतात तांकां धडो मेळटलो अशी प्रतिक्रिया लोकांनी उक्तायली.
मुरगांव पालिकेन जांकां परवाने दिल्यात, पूण जांणी अदीक प्रमाणांत सुवात हातासल्या तांचोय सोद घेवचो. तशेंच पालिकेच्या अधिकऱ्यांनी कांय विक्रेत्यांक तांचीं दुकानां थंयच्यान काडपाची सुचोवणी केल्ली. पूण ते सुचोवणे कडेन आडनदर करप्यां आड संबंदीत अधिकाऱ्यांनी कारवाय कित्याक केली ना वा तांणी ती दुकानां कित्याक काडलीं नात हे संबंदी चर्चा सुरू आसा.
मुरगांव पालिकेन ही फेरी फक्त सातूच दिसांची आसतली अशें जाहीर केलां. पूण तिका आनीक वाडोवन मुजत मेळची हे खातीर आतां सावनूच दबावाचें तंत्र सुरू जालां. ह्या दबाव तंत्राक मुरगांव पालिका सदचे प्रमाण बळी पडत व्हय? हें फुडल्या कांय दिसांनीच कळटलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
