सुण्यान घांस मारपाच्यो दिसाक ४० घडणुको
भांगरभूंय | प्रतिनिधी
साडेपांच वर्सांनी सुणें चाबपाचे ९५ हजार ९०२ प्रकार
पणजी, प्रतिनिधी : हालींच ताळगांवां एका बंगल्यांतल्या राॅटवेलर सुण्यान दोन सान भुरग्यांक घांस मारपाची घडणूक घडली. लोक धांवून वचूंक नासले, जाल्यार त्या भुरग्यांक मरण येवपाची भिरांत आशिल्ली. सुणें चाबपाच्यो घडणुको गोंयांत सदांच घडटात. हातूंत रस्ताद सुण्यांचो तशेंच पोशिल्ल्या सुण्यांचोय आस्पाव आसा. राज्यांत अंदूं दिसाक सुमार ४० सुणीं चावपाच्यो घडणुको नोंद जाल्यात. नोंद जावंक नाशिल्ल्यो घडणुकोय आसपाक शकतात.
भलायकी सेवा संचालनालयान दिल्ल्या आंकड्यां प्रमाण, अंदूं जानेवारी ते जुलय ह्या काळांत सुणे चाबपाच्या वट्ट ८,७०० घडणुकांची नोंद जाल्या. फाटली साडेपांच वर्सां पुराय राज्यांत ९५,९०२ घडणुको घडल्यात.
अहवाला प्रमाण, गोंयांत सुणो चाबपाच्यो घडणुको वाडतूच आसात. वर्स २०१३ त वट्ट १२,८५७ प्रकरणां नोंद जाल्यांत. उपरांत राज्यांत ह्या घडणुकांनी ४४ टक्क्यांनी वाड जाली. २०१६ त वट्ट १८,५८५ प्रकरणां नोंद जालीं. जानेवारी ते मे २०१७ मेरेन राज्यांत ९,०९४ प्रकरणां नोंद जाल्यांत. राज्यात २०१८ त सुणो चावपाचीं २२,५२७ प्रकरणां सांपडलीं, २०१९ त २२,०९० घडणुको नोंद जाल्यो. कोवीड म्हामारी काळांत ह्यो घडणुको कांय प्रमाणांत उण्यो जाल्ल्यो. २०२० त सुण्यान घांस मारपाच्या घडणुकांचो आंकडो ९,५५६ चेर पावलो. २०२१ त तो ९,१२६ चेर गेलो. २०२२ त वट्ट २३,९०३ प्रकरणां नोंद जाल्यांत. हो डेटा सरकारी हॉस्पिटलां, भलायकी केंद्रां, खाजगी रुग्णालयां आनी खाजगी दोतोरांनी नोंद केल्ल्या घडणुकां वरवीं एकठांय केला. दोतोरां कडेन वचूंक नाशिल्लेय लोक आसूं येतात. कारण गोंयांत अजूनय गांवठी उपचार करपी लोक आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
