अखेरेक परेश सावड्डेंकाराक सशर्त जामीन
भांगरभूंय | प्रतिनिधी
पणजी, प्रतिनिधी : बाणस्तारी अपघात प्रकरणांत फाटले 14 दीस न्यायालयीन बंदखणींत आशिल्ल्या श्रीपाद उर्फ परेश सिनाय सावड्डेंकार (मर्सिडीज बेंझ गाडयेचो ड्रायव्हर) हाका बिरेस्तारा उच्च न्यायालयान सशर्त जामीन मंजूर केला.
साक्षीदारांचेर चेपण हाडचें न्हय, १ लाख रुपया हमी आनी तितलेच रकमेचे एक वा दोन हमीदार दिवचे, पासपोर्टा विशीं म्हायती दिवची, सकाळीं 10 ते दनपारां 1 मेरेन 8 दीस तपास अधिकाऱ्यां मुखार हाजीर रावचें… अश्यो अटी घालून उच्च न्यायालयान परेशाक बिरेस्तारा जामीन मंजूर केलो. अपघाताच्या वेळार तो गाडी चलयतालो, अशें परेशाची घरकान्न मेघना आनी भुरग्यांनी आयज फोंडेंच्या पयलो वर्ग न्यायालयांत सांगलें.
सुरेश फडते (58), भावना फडते (52, दोगूय दिवाडी), अरूप करमाकार (26, बांदोडा) हांकां ह्या अपघातांत मरण आयलां. जाल्यार वनिता भंडारी (21, सांताक्रूज- फोंडें), शंकर हळर्णकार (67, बाणस्तारी) राज माजगांवकार (27, ताळगांव) हें गंभीर जखमी जाल्यात. तांचेर अजून जीएमसींत उपचार सुरू आसात.
ह्या अपघातांत मरण आयिल्ल्यांच्या कुटुंबाक आनी जखमींक मेळून २ कोटी रुपया दिवपाचो आदेश कालूच न्यायालयान दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
