भांगरभूंय | प्रतिनिधी
फाल्यां शुक्रारा जातली बसका
मडगांव, प्रतिनिधी : बांदकाम वाठारा प्रमाण शुल्क वाडोवपाच्या प्रस्तावाचेर शुक्रारा मुरगांव पालिकेचे जावपी बसकेंत चर्चा जातली. हो प्रस्ताव मान्य जालो जाल्यार नागरिकांचेर चड अर्थीक वजें पडटलें. प्रस्तावीत वाड सुमार ४० ते ४५ टक्के आसतली, अशी म्हायती शॅडो कौन्सिलाचे साविओ कुतिन्हो हांणी दिली.
हे बसकेंत फाटले बसकेचें इतिवृत्त मंजूर करतले. बांधकाम खात्याच्या मुखेल कार्यकारी अधिकार्यां कडल्यान जारी आदेशा प्रमाण बांधकामां खातीर नवो दर स्विकारपाचो प्रस्ताव आसा. रस्ताद सुण्यांच्या लसीकरणा खातीर कबलात करपाचेर निर्णय घेतले. पालिका वाठारांतलीं गटारां परत मेजपा खातीर सर्वेअर, कन्सटंट नेमपा खातीर ई निविदा जारी करपाचो निर्णय घेवप, साळगावच्या कोयर प्रकल्पांत सोनसड्याच्यान कोयराची येरादारी करपा खातीर गाडयो भाड्यान घेवप, तशेंच नायट सॉयल टँकर, उदकाचो टँकर, सुक्या कोयराचे येरादारी खातीर बॉक्स टायप ब्रिकेटेड वाहन विकतें घेवपाचेर हे बसकेक निर्णय घेतले.
साविओ कुतिन्हो हांणी सांगलें, राज्य सरकारा कडल्यान पयलींच बांदकाम परवानो शुल्कांत वाड केल्या. आतां परत राज्य सरकारान धाडिल्ल्या दरपत्रका प्रमाण ४५ टक्के दरवाड जातली. मडगांव पालिकेन पयलींच नितळसाण शुल्कांत ५० टक्के वाड केल्या. नागरिकांचेर कराचें वजें वाडयतना पालिके कडल्यान बेकायदेशीर बांधकामां, कर चुकोवपी आस्थापनां कडेन आडनदर जाता. बांदकामाच्या बुन्यादीच्या वाठारा प्रमाण शुल्कांत वाड करतले. १०० चौरस मिटर निवासी बांधकामा खातीर ६७,६१६ रुपया शुल्क आशिल्लें, आतां तें ९३,३०७ इतलें जातलें. वेपारी आस्थापनांचें बांधकाम उबारपाक १०० चौरस मिटरां खातीर ७६,९१६ रुपयांचें शुल्क वाडून १,११,५३० इतलें जातलें. लिफ्टीची वेवस्था आशिल्ल्या इमारतींक ८२,२८२ रुपया चड शुल्क भरचें पडटलें. हाचो फटको बिल्डरांक बसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
