मराठी, हिंदी अभिनेत्री सीमा देव हांकां मरण
भांगरभूंय | प्रतिनिधी
मुंबय, खबरां संस्था : नामनेची मराठी, हिंदी अभिनेत्री सीमा देव (८१) आयज संवसाराक अंतरली. तांकां अल्झायमर्स (याद शेणपाचें दुयेंस) जाल्लो. अभिनेते सर्गेस्त रमेश देव हांची ती घरकान्न. अजिंक्य देव आनी दिग्दर्शक, जायरात निर्माते अभिनय हांची ती आवय. मराठी सिनेसृश्टींतली एक सोज्ज्वळ अभिनेत्री म्हूण तांची वळख आशिल्ली. घोव रमेश देव आनी तांची जोडी पड्ड्याचेर खूबच गाजली. तांच्या पार्थिवाचेर आयज सांजवेळा ४ वरांचेर शिवाजी पार्क हांगां निमणे संस्कार जातले.
१९५७ त ‘आलिया भोगासी’ ह्या सिनेमांत तांणी पयले फावट काम केलें. आनंद, सरस्वतीचंद्र, ड्रीमगर्ल, सरस्वतीचंद्र, कोरा कागज, कोशिश (हिंदी), जगाच्या पाठीवर, मोलकरीण, प्रपंच, यंदा कर्तव्य आहे, या सुखांनो या, सुवासिनी, हा माझा मार्ग एकला अशे तांचे जायते सिनेमा गाजले. ८० वयर सिनेमा तांणी केले. तांकां साबार पुरस्कारुय मेळ्ळ्यात. १९६२ त तांचें रमेश देव हांचे कडेन मोगांत पडून लग्न जालें.
तांचें कुळाराचें नांव नलिनी सराफ. त्यो कोंकणीभाशक. कारवारच्यो. पूण तांचो जल्म आनी शिक्षण गिरगांव- मुंबयंतलें. तांणी अभिनया वांगडा लिखाणूय केलां. ‘सुवासिनी’ ही तांची आपजीण.
‘मोलकरीण’ सिनेमांतलें तांचें ‘कशी झोकात चालली कोळ्याची पोर, जशी चवथीच्या चंद्राची कोर’ हें तांचें पद त्या काळार गाजिल्लें. शाळेंत आसतना ती नाच शिकली. आनंदजी हांच्या आॅर्केस्ट्रांत तांणी पदांय म्हणल्यात. ताका लागूनच तांकां अभिनयाची आवड लागली. उच्च वर्णीय आशिल्ल्यान त्या काळार स्टेजीर गाता, नाचता म्हूण तांचेर समाजांतल्यान खर टिका जाल्ली. मात तिणें टिकेक भीक घालीनासतना सिनेमा मळाचेर पावल दवरलें आनी आपली कारकिर्द घडयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
