भांगरभूंय | प्रतिनिधी
म्हापशें: रेवोड्यां रस्त्याचे कुशीक दवरिल्लो कावलांतलो टेलिफोन खांब चोरून व्हरपाचो यत्न करपी तिगां जाणांक कोलवाळ पुलिसांनी अटक केली आनी म्हाल व्हरपी जीप जप्त केली.
अटक केल्ल्यां मदीं दुबावीत अंकूश रामदास काळे (20), सूर्यकुमार रमेश राठोड (20) आनी हेमंत गोविंद नायक (28) सगले मूळ कर्नाटक हांचो आस्पाव आसा.
ही घडणूक मंगळारा रातीं उसरां घडली. रेवोड्यां रस्त्याचे कुशीक बीएसएनलचो दुरध्वनी खांबो दवरिल्लो. हो खांबो कावलांत काडिल्लो. हो खांबो चोरून व्हरत आशिल्ल्याची म्हायती पुलिसांक मेळ्ळी.
ते प्रमाण पुलीस घडणूक थळार दाखल जाले. त्या वेळार दुबावीत महिंद्रा जिपींत खांबो दवरून धांव मारपाचे तयारेंत आशिल्ले.
त्याच वेळार पुलिसांनी दुबावितांक धरले. दुबावितांक पुलीस स्टेशनार हाडून तांचे आड रितसर गुन्यांव दाखल केला आनी तांकां अटक केली. फुडलो तपास पुलीस हवालदार सीताराम चोडणकार करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
