भांगरभूंय | प्रतिनिधी
काणकोण: फाटल्या देड म्हयन्यां पयलीं नगर्श्यां संजू हॉटेला कुशीक रस्त्यार पडिल्लें घातक फोंडकूल काँक्रीट घालून पुरयिल्लें. हें फोंडकूल पुरयिल्ल्यान ह्या मार्गान वचपी वाहनांक लागून काँक्रीट पेड्डेर जावचे न्हय हे खातीर थंय बॅरिकेड्स घाल्ले. काँक्रीट सुकून गेल्लें आनी 21 दिसां परस चड दीस जावनूय गेल्ले. पूण ह्या बॅरिकेड्साक लागून दोनूय वटनाचे येरादारीक आडखळ येत आशिल्ल्याची खबर दिसाळ्यांनी छापून आयले उपरांत ते बॅरिकेड्स कुशीक काडिल्ले.
आतां परतून ते बॅरिकेड्स थंय हाडून दवरल्यात. फोंडकुलाक घाल्लें काँक्रीट घटमूट जावंक नाशिल्ल्यान थंय परतून फोंडकूल पडलां. काल सकाळ सावन कितलींशींच दुचाकी वाहनां ह्या फोंडकुलांत पडिल्ल्यान चाररस्तो हांगासरल्या जागृत तरणाट्यांनी वाहन चालकांक फोंडकुलाची म्हायती जावची ह्या उद्देशान फोंडकुलांत एक झाडाचो खांदो उबो केलो, आनी संबंदीत कचेरेक म्हायती दिली. ही म्हायती मेळ्ळे उपरांत ह्या फोंडकुला कुशीक बॅरिकेड्स हाडून दवरल्यात.
मजगतीं, फाटल्या वर्साय हांगा व्हड फोंडकूल पडिल्लें हाचो अणभव भौशीक बांदकाम खात्याच्या रस्तो विभागाक आसा. राष्ट्रीय म्हामार्ग 66 चेर पडिल्ल्या ह्या फोंडकुलाची सुवात पानथळ आसून जमीन भुसभुशीत आसा. ताका लागून फोंडकूल पुरयतना फक्त काँक्रिटाचो लेप लावन चलचें ना. थंय कायचें बऱ्या दर्जाचें सिमेंटाचे पायप घालून दोंगरमाथ्या वेल्यान येवपी उदकाक सुवात करून दिल्यार हें फोंडकूल सेगीत खचून वच्चें ना अशें संतोष गांवकार हांचें म्हणणें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
