भांगरभूंय | प्रतिनिधी
म्हापशें: पुलीस कंट्रोल रुमांत एक कॉल आयलो… मुखा वेलो मनीस म्हणपाक लागलो ‘हॅलो सायब, सडयां शिवोले एके चलयेचो खून जाला…’ रोखडोच कंट्रोल रुमान म्हापशें पुलिसां कडेन संपर्क सादलो. म्हापशें पुलिसांनी वेळ व्हगडायनासतना पंगड तयार करून सडयां शिवोले धाडून दिलो. पंगडान थंयचे तीन वाडे पिंजून काडले. पूण खुनाचो कसलोच पत्तो लागलो ना. निमाणें कॉल करप्याक पुलिसांनी सोदून काडले उपरांत तेवूय अजाप जाले. कारण फोन करपी सोरो पियेवन तरर्र आशिल्लो.
ही घडणूक काल (मंगळारा) सकाळीं 10.30 वरांचेर घडली. एका 40 वर्सां पिरायेच्या सोरो पियेल्ल्या मनशान म्हापशें पुलिसांची धांदळ उडोवन दिली. सोऱ्याचे घुंवळेंत तरर्र जाल्ल्या ह्या मनशान कंट्रोल रुमाक फोन केल्लो. फोनार ताणें सडयां शिवोले भरवणवाडो, बामणवाडो आनी हॉलीक्रॉस वाठारांत एके चलयेचो खून जाल्ल्याची म्हायती दिली.
कंट्रोल रुमान रोखडेंच म्हापशें पुलिसांक सादूर केलें. म्हापशें पुलिसांचो पंगड रोखडोच घडणूक थळार दाखल जालो. तांणी तिनूय वाडे पिंजून काडले. पूण थंय कसलोच खुनाचो प्रकार घडूंक नाशिल्लो. निमाणें पुलिसांनी कॉल करप्याचो सोद घेतलो. तेन्ना तो सोरो पियेवन तरर्र आशिल्ल्याचें दिसून आयलें. सोऱ्याचें घुंवळेंत ताणें ही फटीची म्हायती पुलिसांक दिल्ल्याचें स्पश्ट जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
