भांगरभूंय | प्रतिनिधी
म्हापशें: कोलवाळ उद्देगीक वसणुके कुशीक घुंवळे वखदां विरोधी पुलीस पंगडान धाड घाली. दुबावीत सुरल सुखानंद फडते (27, रा. कोलवाळ) हाका अटक केल्या आनी ताचे कडल्यान 1 लाख 40 हजारांचो एमडीएमए आनी गांजो जप्त केला.
ही कारवाय पुलिसांनी सोमारा मध्यान रातीं केली. कोलवाळ उद्देगीक वसणुकेंत घुंवळे वखदांचो वेव्हार जावपाचो आशिल्ल्याची म्हायती पुलिसांक मेळिल्ली. ते प्रमाण पुलिसांनी घडणूक थळार सांपळो रचलो.
दुबावीत घुंवळे वखदांचे विक्रे खातीर येतकूच ताका पुलीस पंगडान धरलो. ताची झडटी घेतली तेन्ना दुबाविता कडेन 12 ग्राम एमडीएमए आनी 200 ग्राम गांजो हीं घुंवळे वखदां सांपडलीं.
उपरांत पुलिसांनी दुबाविता आड ड्रग्स प्रतिबंधक कायद्या खाला गुन्यांव नोंद करून दुबावीत सुरल फडतेक अटक केली.
मजगतीं, दुबावीत आरोपी सुरल फडते हो खांपो गुन्यांवकार आसून लुटमार आनी घरफोडीचे गुन्यांव ताचेर नोंद आसात.
कोलवाळ पुलिसांनी निरिक्षक विजय राणे सरदेसाय हांच्या फुडारपणा खाला उपनिरिक्षक रोहन मडगांवकार, हवालदार रुपेश कोरगांवकार, कॉन्स्टेबल सुलेश नायक, संदीप मळीक आनी अजय गावडे ह्या पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
