भांगरभूंय | प्रतिनिधी
वास्को, प्रतिनिधी: देव दामोदरा मुखार उद्देजक प्रशांत जोशी हांणी मंगळारा दनपरां साडेबारा वरांचेर श्रीफळ दवरले उपरांत चोवीस वरांच्या वास्को भजनी सप्ताक भक्तीभावान सुरवात जाली. बुधवारा दनपरां श्रीफळ दर्याक अर्पण करतकच सप्तकाची सांगाता जातली. फेरी मात सात दीस आसतली.
पोरूं कोविडाक लागून वास्को सप्तकाचेर कांय बंदनां आशिल्लीं. पूण अंदूं सदां भशेन उमेदीन सप्तक मनयतले. मंगळारा दनपरां चोवीस वरांच्या भजनी सप्ताची सुरवात भजनी कलाकार अशोक मांद्रेंकार (शिवलकार) हांणी केली.
मुख्यमंत्री डॉ. प्रमोद सावंत, खासदार सदानंद शेट तानावडे, बिहाराचे राज्यपाल राजेंद्र आर्लेकार, पंचायत मंत्री मॉवीन गुदिन्हो, मुरगांवचे नगराध्यक्ष गिरिश बोरकार, उद्देगपती नारायण बांदेकार, उद्देगपती शिवानंद साळगांवकार, उपजिल्होधिकारी भगवंत करमली तशेंच हेरांनी देव दामोदरचें दर्शन घेतलें. भक्तांनीय सकाळ सावन रांको लायिल्ल्यो.
पुलिसांनी कायदो आनी सुवेवस्था नीट उरचे खातीर सगळे कडेन सिसिटिव्ही कॅमेरे लायल्यात. भक्तांक त्रास जावचे न्हय देखून थळावे प्रशासन अधिकारी लक्ष दवरून आसा.
आयज रातभर गोंय, महाराष्ट्र राज्यांतल्या विवीध गायकांच्यो मैफिली रंगतल्यो. मुरगाव हिंदु समाजा वतीन अंदूंय भक्तां खातीर म्हाप्रसादाची वेवस्था केल्या. रातचो उसरां मेरेन भक्तांक प्रसादाचो लाव घेवपाक मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
