मोरजेच्या सिंथियाक न्याय मेळटलो?
भांगरभूंय | प्रतिनिधी
पेडणें, प्रतिनिधी : मोरजेंतल्या विठ्ठलदास वाड्यार रावपी सिंथिया मोनिका फर्नांडीस हिच्या आवय, बापूय आनी भावाक चार वर्सां आदीं चोपडें शिवोले पुलाचेर जाल्ल्या अपघातांत मरण आयिल्लें. सध्या सिंथिया एका मोडक्या घरांत रावता. ताका सारकीं दारां नात. पांख्याक वाळटी, उदकाची गळती लागल्या. संडास आनी उदकाची वेवस्था ना. संडास बांदपाक, घर सारकें करपाक भाटकार हरकत घेता. हाची दखल थळावे आमदार जीत आरोलकार आनी मुख्यमंत्री डॉ. प्रमोद सावंत हांणी घेवन एकमुळी जीण जगपी सिंथियाक सरकारचे वतीन आदार दिवचो. तिच्यो समस्या सोडोवच्यो, अशी मागणी थळाव्या लोकांनी केल्या.
चड म्हायती प्रमाण, सिंथियाक चार वर्सां आदीं अपघात जाल्लो. तातूंत तिचे पालक आनी भावाक मरण आयिल्लें. तिणें खूब लागसारच्यान हो भिरांकूळ अपघात पळयल्लो. ह्या दुख्खान ती आयज जगता. न्याय मेळचो देखून लढटा. पूण न्याय मेळोवन दिवपाक आयज कोणूच ना. फकत वेंचणुको आसता तेन्ना उमेदवार येवन मत मागून वतात आनी वेंचून आयल्या उपरांत आडनदर करतात.
भाटकार संडास बांदपाक, घर दुरुस्त करपाक आडखळी हाडटा. कुशीक सुकत घाल्ले कपडे काडून उडयता. न्हांवपाक चुडटांचो आडोस केल्यार तो मोडून उडयता. संडासाची वेवस्था करची तरी कशी? अशें सिंथियान सांगलें.
सिंथियाचे पालक, भाव अपघातांत गेले. पूण सरकारान तिका वेवस्थीत अशें घर दिवंक ना. मोडूंक पाविल्लें घरूय दुरुस्त करपाक तिका मेळना. ह्या घरार प्लास्टीक घालून तें धांपून दवरपाचो ताणें यत्न केला. घरांत खाट आनी हेर सामान ना. न्हिदतना जीव मुठींत घेवन न्हिदचें पडटा. रातच्या वेळार भाटकार आपले सुरक्षारक्षक हाडून दवरता, असो गंभीर आरोप ताणें केलो. अशे वायट स्थितींत सिंथिया जगता. ताका आदार दिवपा खातीर रातची एकटी बायल तिच्या घरा येता. सरकार तिका कित्याक मजत करिना, असो प्रस्न कांय लोकांनी विचारलो.
आतां तरी मुख्यमंत्री डॉ. सावंत आनी आमदार आरोलकार हांणी सिंथियाक न्याय मेळोवन दिवचो, अशी मागणी तिच्या शेजाऱ्यांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
