भांगरभूंय | प्रतिनिधी
फोंडें: खांडेपार जंक्शना कडेन सोमारा सांजवेळा एका गतीन धांवपी म्हालाची येरादारी करपी ट्रकाचें नियंत्रण गेल्ल्यान तो रस्त्यार कोसळ्ळो. ह्या अपघातांत एका मोटारी सयत 3 दुचाकीं ट्रका पोंदा चिड्डल्यो. अपघातांत कोणूच जखमी जावंक ना. सेगीत जावपी अपघात आडावपा खातीर सरकारान अर्दकुटें दवरिल्लें पुलाचें काम बेगीन पुराय करचें अशी मागणी जमावांतल्या लोकांनी केली.
मेळिल्ले म्हायती प्रमाण म्हाल व्हरपी ट्रक फोंडें सावन खांडेपारा वतालो. एका वाहनाक ओव्हरटेक करता आसतना चालकाचें ट्रका वेलें नियंत्रण सुटलें. त्याच वेळार म्हाल व्हरपी ट्रकाचो धपको उसगांवचे दिशेन वचपी ट्रकाक बसलो. हो ट्रक मुखा वयल्यान यवपी मोटारीचेर कोसळ्ळो. पूण सुदैवान कार चालक सुखरूप वाटावलो. ट्रकाक धपको दिले उपरांत म्हाल व्हरपी ट्रक रस्त्यार कोसळ्ळो.
त्याच वेळार रस्त्यार 3 दुचाकी पार्क केल्ल्यो. अपघातांत पार्क केल्ल्यो तिनूय दुचाकी म्हाल व्हरपी ट्रका खाला चिड्डल्ल्यान दुचाकींचें व्हड प्रमाणांत लुकसाण जालां.
खांडेपार जंक्शनार दनपारच्या वेळांत व्हड प्रमाणांत विद्यार्थी बशीची वाट पळयत रस्त्याचे कुशीक उबे रावतात. ताका लागून दनपारच्या वेळार अवजड वाहनां फाटल्या कांय म्हयन्यां सावन पुलिसांच्या नियंत्रणा खाला सोडटात. हो अपघात दनपारच्या वेळार घडिल्लो जाल्यार वाठारांत मोटी दुर्घटना घडपाची. सरकारान अशे तरेची घडणूक घडचे पयलीं अर्दकुटो स्थितींत दवरिल्लें पुलाचें काम पुराय करून अवजड वाहनांची येरादारी नव्या पुला वयल्यान करपाची मागणी नेट धरूंक लागल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
