भांगरभूंय | प्रतिनिधी
पावसा पयलीं रस्त्याची कामां जातली पुराय
पणजी : गवंडाळे रेल्वे उड्डाण पूल पुराय करपाची डेडलायन ऑक्टोबर आसली तरी ते पयलींच पुलाचें काम पुराय करपाचे येत्न आसात. पावसांत रस्ते हॉटमिक्स करप शक्य नाशिल्ल्यान मे मेरेन रस्त्यांचीं कामां पुराय करपाचे यत्न आसा. जीएसआयडीसीच्या अधिकार्यांकडल्यान ही म्हायती मेळ्ळी.
रस्तो बंद आसून लेगीत रस्त्यावेल्यान वाहनां सुरूच आशिल्ल्यान कामाक आडखळ जाता, अशी म्हायती कुंभारजुवेचे आमदार राजेश फळदेसाय हांणी दिली.
खामे उबारपाचो वावर पुराय जाला. रस्त्यांचे काम पुराय जाले उपरांत खाम्याचेर घालपी स्लॅब जोडून हाडपाचो निर्णय कंत्राटदारान घेतला. स्लॅब जोडपाचे कंत्राट हैदराबाद हांगच्या कंत्राटदाराक दिला. रस्त्याचें काम पुराय जाले उपरांत खाम्याचेर स्लॅब घालपाचें काम सुरू जातलें. हाचे खातीर रस्तो पुराय बंद दवरचो पडटलो. दोनूय वटेन पुलीस फौजफाटो दवरून हे काम जातलें. खाम्याचेर स्लॅब चडोवपाचो वावर रातचो करपाचे येत्न आसले तरी उजवाडाक लागून आडखळ निर्माण जावपाची शक्यताय आसा.
ह्या पुला खातीर ४० कोटींच्या कामाची निविदा जारी जाल्या. पूल पुराय जाले उपरांत माशेल, आमोणा, कुडणें, नावेली, सांखळे सयत सत्तरी म्हालांतल्या लोकांक पणजे बेगीन पावप शक्य जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
