भांगरभूंय | प्रतिनिधी
मे म्हयनो सुरू जालो आनी आतां खऱ्या अर्थान भुरग्यांक सुटी पडली. हो बदल फाटल्या कांय काळा सावन जालो आनी नव्या शैक्षणिक धोरणाचो (NEP) तो परिणाम आसूं येता. सुटी म्हणल्यार फक्त मजा करप न्हय; मजा तर करपाचीच, पूण ती थोड्या प्रमाणांत आसची. सुटयेचो चडसो उपेग स्वताच्या विकासा खातीर करचो.
सध्या गिमाचे दीस आशिल्ल्यान थंड उदकांत न्हावपाची ओढ लागता. अशा वेळार तुमी जर बांध वा न्हंयेचेर वतात, जाल्यार घरच्यांक सांगून वचात. तशेंच, वांगडा अशा कोणाक तरी व्हरात जाका पेंवपाक येता. पेवप ही एक महत्त्वाची कुशळटाय आसा. गोंयाक 105 किलोमिटराची दर्यादेग लाभल्या, देखून दरेका गोंयकाराक पेवपाक येवपाची गरज आसा. हें कसब तुमकां केन्ना ना केन्ना उपेगाक येतलेंच. आजकाल खंयचेय मुलाखतीक गेल्यार ‘तुमकां टू-व्हीलर वा फोर-व्हीलर चलोवपाक येता काय ना?’ हो प्रश्न चड करून विचारतात.
सुटी मोलादीक जावची, ह्या उद्देशान वर्तमानपत्रांत येवपी लेख आवडीन वाचात. जर तुमकां गाडी चलोवपाची ओढ आसत, तर सुरवात सायकली सावन करात. सायकलीक लायसन्सची गरज नासता, पूण 18 वर्सां पूर्ण जातकच गाड्यांचें लायसन्स मात नक्की काडात. गाडी शिकपाचो सराव सूर्य उदेवचे पयलीं वा सूर्य अस्तंमता त्या वेळार करात.
शुद्धलेखनाचे फायदे वेगळे सांगपाची गरज ना. हाका लागून तुमचें अक्षर सुदारतलें आनी बरोवपाचो वेग लेगीत वाडटलो. वाचनाची संवय आसल्यार परिक्षेच्या वेळार तुमकां वेळ पावना, असो प्रस्न केन्नाच येवचो ना. हें काम तुमी घरा बसून, टिव्ही पळयत वा गोंदळ आशिल्ल्या सुवातांचेर लेगीत करूंक शकतात. वाचनांत जीं कठीण उतरां येतात, तांचो अर्थ शब्दकोशांत पळयात. एखादें नवें वाक्य आयल्यार तें प्रत्यक्षांत कशें वापरप, हाचो सराव करात. हीच सवय तुमकां नवी भास शिकपाक मदत करतली.
आजकाल ‘एआय’ चे (कृत्रिम बुद्धिमत्ता) मजतीन भास सुदारप सोपें जालां. ऑनलायन माध्यमांतल्यान तुमी जायत्यो गजाली शिकूं शकतात. आदले पेपर घड्याळ लावन सोडवपाचो सराव करात. शब्दकोडीं सोडवपाचे व्हड फायदे आसात; ताका लागून तुमचो शब्दसंग्रह वाडटा. फुडें वचून तुमी स्वता लेगीत अशीं कोडीं, हुमाणीं तयार करूंक शकतात.
करियराच्या नदरेन महत्वाच्या संस्थांक भेटी दिवन तांचो वावर जाणून घेयात. देखीक- मिरामारा आशिल्लें विज्ञान केंद्र, हडफड्यां सुरू जाल्लें केंद्र वा बेतलांतल्या खाजगी विद्यापीठाक भेट दिवन म्हायती मेळयात. सुटींत भरपी वेगवेगळ्या शिबिरांनी वांटो घेयात. सगळ्यांत म्हत्वाचें म्हणल्यार, पुस्तक वाचपाची संवय लायात. ताचे पयलीं लागसारच्या ग्रंथालयाचे वांगडी जायात.
जर तुमकां चित्रकला आवडटा, तर तातूंत लेगीत वेळ सारून सुटी मोलादीक करात. करियरांत येवपी अडचणी सुटयेच्या काळांत सुटाव्यो करूंक शकतात. देखीक- नीट (NEET) वा नेट (NET) सारक्या परीक्षां विशीं गोंदळ आसल्यार, त्यो परिक्षा कितें आसात आनी आमी त्यो कित्याक दितात, हें जाणून घेयात. ‘एआय’ चो उपेग करून फुडल्या वर्साच्या अभ्यासक्रमाची तयारी करात.
खंयच्या मळाचेर उमेदवारांचो उणाव आसा आनी खंयच्या मळाचेर सर्त चड आसा, हें जाणून घेवपाचो प्रयत्न करात. सांजवेळार भोंवडेंक वतना भोंवतणच्या झाडांची म्हायती घेयात. तुमच्या गांवांतलीं न्हंय- व्हाळ, थंय मेळपी नुस्तें वा उण्यो जायत चलिल्ल्यो वनस्पती हांचो लेगीत अभ्यास करात. ही सुटी म्हणल्यार, तुमकां नवें कितें तरी शिकपाची आनी करियराची बुन्याद घट करपाची एक व्हड संद आसा.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
