शॉर्टफॉर्म : खंयचे खरे, खंयचे अशेच!
भांगरभूंय | प्रतिनिधी
आमी दर दिसा वापरतात पूण खबर फूलफॉर्म खबर नाशिल्ले जायते शॉर्टफॉर्म आसात. भारतांत अशे जायते फुल फॉर्म सोशल मिडियाचेर व्हायरल जावपाक लागल्यात. हातूंतले कितलेशेच शॉर्टफॉर्म लोकांनीच फामाद केल्यात. तांचें अधिकृत फुलफॉर्म ना.
आयच्या डिजिटल युगांत आमी दर दिसा जायते ब्रँड वापरतात- बँकिंगा खातीर एचडीएफसी, गाडयेच्या टायरांक एमआरएफ, घरगुती वस्तूं खातीर टाटा आनी लायटी खातीर सिस्का. पूण ह्या नांवां फाटल्यान कितें आसा? चडशा लोकांक तांचें फुलफॉर्म खबर ना.
- एचडीएफसी
एचडीएफसी म्हणल्यार हावसींग डेव्हलपमेंट फायनान्स कॉर्पोरेशन. ही भारतांतली सगळ्यांत व्हडली हावसींग फायनान्स कंपनी आशिल्ली आनी उपरांत ती एचडीएफसी बँकेंत रुपांतरीत जाली. 1977 त स्थापन जाल्ले एचडीएफसी लिमिटेड कंपनीन लाखांनी भारतीयांक घरां विकतीं घेवपाक आदार केलो. 2023 त एचडीएफसी लिमिटेड एचडीएफसी बँकेंत विलीन जावन भारताची सगळ्यांत व्हडली खाजगी बँक तयार जाली. लोकांक एचडीएफसी चड करून फकत बँक अशें दिसता, पूण प्रत्यक्षांत ताची सुरवात हावसींग फायनान्सांतल्यान जाली.
- एमआरएफ
एमआरएफ म्हणल्यार मद्रास रबर फॅक्टरी. 1946 त चेन्नयंत (तेन्नाचें मद्रास) के. एम. मॅम्मेन मप्पिलाई हांणी सुरू केल्ले हे कंपनींत सुरवेक बोमाडे आनी रबराचीं खेळणीं तयार करताले. उपरांत ही भारतांतली सगळ्यांत व्हडली टायर तयार करपी कंपनी जाली. आयज गाडयो, सायकल, ट्रक, रेसिंगांत एमआरएफ टायर वापरतात. कंपनीची सुरवात ल्हान आसिल्ली, पूण गुणवत्तेचेर लक्ष केंद्रीत केल्ल्यान ही कंपनी संवसारांतल्या टायर तयार करपी व्हड्या कंपनीं मदली एक कंपनी जाली.
- टाटा
टाटा हें संक्षिप्त नांव न्हय. हें संस्थापक जमशेटजी नुसेरवांजी टाटा हाच्या आडनांवाचेर आदारिल्लें आसा. 1868 वर्सा जमशेटजी टाटान टाटा समुहाची थापणूक केली. आयज टाटा समूह ही भारतांतली सगळ्यांत व्हडली वेवसायीक संघटणा आसून तातूंत टाटा स्टील, टाटा मोटर्स, टीसीएस, टाटा पॉवर, टायटन, आनी हेर कंपनींचो आस्पाव जाता. टाटा नांवाचो संबंद प्रामाणीकपण, समाजीक जापसालदारकी आनी राष्ट्रनिर्माण हांचे कडेन आसा. जायत्या जाणांक दिसता की टाटा हाचें एकादें फुलफॉर्म आसतलें, पूण तें फकत संस्थापकाचे नांव आसा.
- सिस्का
सिस्का ब्रॅण्ड एलईडी लायटी, मोबायल एक्सेसरीज आनी घरगुती उपकरणां तयार करता. सिस्का एलईडी 2010 च्या सुमाराक बाजारांत हाडली आनी रोखडीच लोकप्रियता मेळ्ळी. ताचो अधिकृत फुलफॉर्म ना. हें एक ब्रँड नांव. लोक केन्ना केन्नाय सोशल मिडियाचेर फकाणां वा चुकीची म्हायती पातळायतात, पूण कंपनीन केन्नाच आपलें फुलफॉर्म जाहीर करूंक ना. सिस्कान उर्जा वाटावपी एलईडी बल्ब क्रांती भारतांत हाडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
