भांगरभूंय | प्रतिनिधी
विश्वनाथ परवार आनी नऊ खरवत हांची निवड
वाळपय : ठाणे आनी पिसुर्ले ग्रामपंचायतींचे पोटवेंचणुकेंत दोनूय प्रभागांतले उमेदवार विरोधाविणें वेंचून आयले. हे विशींची अधिकृत घोशणा सत्तरी म्हालाचे मामलेदार तशेंच वेंचणूक अधिकारी धीरेंद्र बाणावलीकार हांणी केली.
मेळिल्ले म्हायती प्रमाण, ठाणे ग्रामपंचायतीचो प्रभाग नंबर १ तल्यान निलेश परवार हांणी राजिनामो दिले उपरांत ते सुवातेर पोटवेंचणूक जाहीर केल्ली. ह्या प्रभागांतल्यान विश्वनाथ दत्ताराम परवार हाचो एकूच अर्ज दाखल जाल्ल्यान तांची विरोधाविणें निवड जाहीर केली.
ते प्रमाण, पिसुर्ले ग्रामपंचायतीच्या प्रभाग क्रमांक ७ तल्यान नामदेव चारी हांणी राजीनामो दिले उपरांत घेतिल्ले पोटवेंचणुकेंत नऊ खरवत हाचो एकमेव अर्ज दाखल जाल्लो. हाका लागून तांचीय विरोधाविणें निवड घोशीत केली.
मजगती, शेनवार आमदार डॉ. देविया राणे हांणी दोनूय विरोधाविणें वेंचून आयिल्ल्या उमेदवारांक परबीं भेटयलीं. वाळपयच्या कार्यालयांत तांकां फुलांतुरे दिवन जनतेच्या सेवे खातीर तत्पर रावपाचो उलो मारलो.
ह्या वेळार प्रभागांतलीं उरिल्ल्या कामाचेर भर दिवपाची आशिल्ल्यान नागरिकांक बर्यो सुविधा आनी सेवा दिवपाचे यत्न करचे, अशी अपेक्षा उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
