भांगरभूंय | प्रतिनिधी
कँटोना सावन रोनाल्डो मेरेन आनी योर्क-कोल सावन रुनी मेरेन, ह्या क्लबान सदांच यशाचे नवे मार्ग सोदून काडले. हीच बळीश्ट परंपरा फुडारा खातीर उमेद जिवी दवरता.
संवसारांतल्या थोड्याच फुटबॉल क्लबांक मँचेस्टर युनायटेड सारको इतिहास आसा. हो क्लब फकत करंड जिखपा खातीर न्हय, तर दरेके पिळगेक एका परस एक बऱ्यांतले बरे खेळगडे दिवपा खातीर फामाद आसा. 1990 च्या दशकांत, वेवस्थापक सर अॅलेक्स फर्ग्युसन हांच्या मार्गदर्शना खाल युनायटेड फुटबॉल विश्वांतलो एक बळिस्ट संघ जालो. ह्या पंगडाची खेळपाची शैली, शिस्त आनी जिखपाच्या तीव्र इत्से खातीर वळख आसा. मँचेस्टर युनायटेडा कडेन सदांच आगळे- वेगळे खेळगडे आशिल्ले. तांकां ‘रेड डेविल्स’ ह्या नांवान वळखतात आनी इंग्लंडांतलें ‘ओल्ड ट्रॅफर्ड’ हें तांचें हक्काचें घरगुती मैदान.
त्या काळांत ड्वाइट योर्क आनी अँडी कोल हांची भागीदारी पंगडाची मुखेल तांक आशिल्ली. तांचो एकमेकां मदलो समन्वय अजाप करपा सारको आशिल्लो आनी तांणी जायते गोल केले, खास करून 1998- 99 च्या हंगामांत. 1999 च्या ‘युईएफए चॅम्पियन्स लीग’ सर्तीचे निमणे मॅचींत टेडी शेरिंगहॅम हाणें बरोबरीचो गोल करून एक म्हत्वाची भूमिका केली. तेच मॅचींत ओले गुनार सोल्शर हाणें जैतिवंत गोल मारून ‘सुपर सबस्टिट्यूट’ म्हूण नांव मेळयलें. हो संघ फकत प्रतिभावानच न्हय, तर सुसंघटीत आशिल्लो, जंय दरेक खेळगड्याक आपली भूमिका नेमकी खबर आशिल्ली.
2000 च्या दशकांत संघाच्या आक्रमणाची पद्दत बदल्ली. ती चड थेट आनी संद मेळटा थंय गोल करपाचेर लक्ष केंद्रीत करपी जाली. रुड वॅन निस्टेलरोय हें ताचें उत्तम उदाहरण, कारण ताची गोल मारपाची तांक अद्भूत आशिल्ली. फुडें वेन रुनी हो टिमीचो एक सामको म्हत्वाचो खेळगडो जालो, जो गोल करपाक, संद निर्माण करपाक आनी पंगडा खातीर कश्ट उपसुपाक सदांच तयार आसतालो. लुई साहा हाणें फिट आसतना आपल्या वेगाची आनी कुशळटायेची जोड दिली. फुडें रॉबिन वॅन पर्सी हाणें आपले बरे कामगिरीच्या आदारान 2012 त युनायटेडाक ‘लीग’ जिखून दिली. खेळपाची शैली बदल्ली तरी पंगडान आपली जिखपाची परंपरा चालूच दवरली.
घट्ट राखणफळी (Defence) आनी मध्यफळी (Midfield) हें युनायटेडच्या यशाचें गुपीत आशिल्लें. रिओ फर्डिनांद आनी नेमान्जा विडिच हांचे पयलीं, स्टीव्ह ब्रुस आनी गॅरी पॅलिस्टर हांणी राखणफळीचें फुडारपण केल्लें. गोलकी पीटर श्मिचेल हो फाटल्यान एक खरो फुडारी आशिल्लो. जाप स्टॅम हाणें राखण फळी अजून बळीश्ट केली. डेनिस इर्विन आनी गॅरी नेव्हिल हे सातत्यपूर्ण ‘फुल-बॅक’ आशिल्ले जे राखण आनी आक्रमण अशा दोगांयनाय आदार दिताले. फर्डिनांद आनी विडिच हांणी फुडें एक आधुनिक आनी बळीश्ट भागीदारी तयार केली.
मध्यफळींत रॉय कीन हो उर्जेन भरिल्लो फुडारी आशिल्लो. पॉल स्कोल्स आपल्या पासिंग आनी दूरदृष्टीन खेळाचेर नियंत्रण दवरतालो. रायन गिग्स हाणें जायतीं वर्सां विंगाचेर आपली निर्मितीक्षमता दाखयली. फुडें मायकल कॅरिकान खेळांत शांतता आनी समतोल हाडलो, जाका लागून पंगडाक सामन्याचेर ताबो दवरपाक सोंपें जालें.
गोलकी म्हूण एडविन वॅन डर सार हाणें आपल्या अणभवान आनी शांत स्वभावान चॅम्पियन्स लीगे सारखे व्हड करंडक जिखपाक मदत केली. ताच्या उपरांत डेव्हिड डी गिया हो संवसारांतल्या बऱ्या गोलकी मदलो एक जालो आनी कठीण काळांत ताणें जायते खेपे पंगडाक सावरलें.
मँचेस्टर युनायटेड कडे सदांच खाशेले खेळगडे आशिल्ले. एरिक कँटोनान पंगडाक आत्मविश्वास आनी विस्वास दिला. डेव्हिड बेकहॅम हाणें खेळांत सृजनशीलता हाडली आनी तो एक जागतिक स्तराचो सुपरस्टार बनलो. क्रिस्टियानो रोनाल्डो हाचो विकास याच क्लबांत जावन तो फुटबॉल इतिहासांतल्या महान खेळगड्यां मदलो एक जालो. हालींच्या वर्सांनी ब्रुनो फर्नांडीस हो मुख्य कल्पक खेळगडो थारला, जो उर्बेने आनी सातत्यान पंगडाचें फुडारपण करता.
फुडाराचो विचार केल्यार अमाद डियालो, ब्रायन म्ब्युमो, मॅथ्यूस कुन्हा आनी बेंजामिन शेश्को सारखे तरणाटे खेळगडे आशेचे किरण दिसतात. ते आदल्या महान खेळगड्यांच्या पांवड्यार पावतले काय ना हें आतांच सांगप कठीण, पूण युनायटेड कडल्यान अपेक्षा सदांच उंच आसतात.
निमणे कडेन, मँचेस्टर युनायटेडाक जें खाशेलें करतात ते फकत ताचे खेळगडे न्हय, तर आपली वळख सांबाळून काळा नुसार बदलत रावपाची तांक. कँटोना सावन रोनाल्डो मेरेन आनी योर्क-कोल सावन रुनी मेरेन, ह्या क्लबान सदांच यशाचे नवे मार्ग सोदून काडले. हीच बळीश्ट परंपरा फुडारा खातीर उमेद जिवी दवरता.
(लेखक मँचेस्टर युनायटेडाचे एक कडवे समर्थक आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
