निरिक्षकाची बदली केल्ल्यान एसआयटी जाली खिळखिळीत; उरले तिनूच उपनिरिक्षक

भांगरभूंय | प्रतिनिधी

जमीन हडप केल्ल्या प्रकरणा खातीर स्थापन केल्ली एसआयटी

पणजी: गोंयांत गाजिल्ल्या जमीन हडप प्रकरणाची पाळांमुळां खणून काडपा खातीर गोंय सरकारान विशेश तपास पंगड (एसआयटी) स्थापन केला. ह्या पंगडांत तपास करपी पुलीस निरिक्षक सूरज सामंत हांची खात्यान अचकीत बदली केल्या. हाका लागून एसआयटींत आतां एकूय निरिक्षक उरिल्लो ना. सगलो तपास तीन उपनिरिक्षकांच्या हातांत दिला. हाका लागून गुन्यांवकारा मेरेन पावचे पयलींच एसआयटी खिळखिळी जाल्या अशी चर्चा सुरू जाल्या.

गोंय पुलीस खात्यान सोमारा आदेश जारी करून दोन पुलीस निरिक्षकांच्यो बदल्यो केल्यात. तातूंत अर्थीक गुन्यांव विभागांतले निरिक्षक सूरज सामंत हांची बदली बेतूल दर्यादेग पुलीस स्टेशनार केल्या. सूरज सामंत हे एसआयटींत सेवा दिवपी एकूच निरिक्षक आशिल्ले. आतां ह्या पंगडांत एकूय निरिक्षकपदा वयलो अधिकारी उरिल्लो ना. जाल्यार बेतूल दर्यादेग पुलीस स्टेशनार सेवा दिवपी निरिक्षक अरूण गांवस देसाय हांची बदली मायणा कुडटरी पुलीस स्टेशनार केल्या.

पुलीस खात्यान मे म्हयन्यांत एसआयटींत सेवा दिवपी निरिक्षक सखाराम परब हांची बदली केल्ली. तांचे सुवातेर अजून कोणाचीच बदली केली ना. जाल्यार आतां एकसुरो उरिल्लो निरिक्षक सूरज सामंत हांची बदली केल्या. तशेंच निरिक्षक अरूण गांवस देसाय हांची फाटल्या दोन म्हयन्यांत तिसरे फावटी बदली केल्या. तांची घुंवळे वखदां विरोधी पंगडांतल्यान केपें पुलीस स्टेशनार बदली केल्ली. पूण थंय ते रुजू जावचे पयलींच तांची बदली बेतूल दर्यादेग पुलीस स्टेशनार केली. जाल्यार कांय दिसां पयलीं मायणा-कुडटरी पुलीस स्टेशनार सेवा दिवपी निरिक्षक रवी देसाय हे निवृत्त जाल्ले. तांचे सुवातेर अरूण गांवस देसाय हांची बदली केल्या. हे विशींचो आदेश मुख्यालयाचे पुलीस अधिक्षक शेखर प्रभुदेसाय हांणी सोमारा काडला.

गोंयांत जमीन हडप केल्ल्याचीं प्रकरणां मुखार येवंक लागले उपरांत खवदळ पडिल्लो. ह्या प्रकरणांची पाळांमुळां खणून काडपा खातीर गोंय सरकारान 15 जून 2022 दिसा आयपीएस अधिकारी निधीन वाल्सन हांच्या फुडारपणा खाला एसआयटीची स्थापणूक केल्ली. त्या वेळार पंगडांत सरकारान दोन निरिक्षकां सयत हेर सरकारी अधिकाऱ्यांचो आस्पाव केल्लो.

उपरांत 21 जून 202 दिसा पुलीस खात्यान एसआयटी घटमूट करपा खातीर पुलीस निरिक्षक सखाराम परब हांचे सयत दोन पुलीस निरिक्षका सयत, पांच उपनिरिक्षक, दोन सहाय्यक उपनिरिक्षक आनी 22 कर्मचाऱ्यांचो एसआयटींत आस्पाव केल्लो. ते प्रमाण एसआयटी कडेन 33 कर्मचाऱ्यांची फौज आशिल्ली. उपरांत पुलीस निरिक्षक सूरज सामंत हांची एसआयटींत बदली केली. आतां सामंत हांची थंय सावन बदली जाल्ल्यान एसआयटीत तीन उपनिरिक्षकां सयत फक्त 13 कर्मचारी कार्यरत आसात अशी म्हायती मुखार आयल्या.

एसआयटीची आतां मेरेनची कामगिरी

* जमीन हडप प्रकरणांत एसआयटी स्थापन केले उपरांत जमनी विशीं कायदेशीर निर्णय घेवपा खातीर सरकारान 9 सप्टेंबर 2022 दिसा आदेश जारी करून निवृत्त न्यायाधीश व्ही. के. जाधव हांची एक वांगडी चवकशी आयोगाची स्थापणूक केल्या.

एसआयटीन फाटल्या वर्सा 46 गुन्यांव हाताळ्ळ्यात. तातूंतलो एक गुन्यांव रद्द केला. जाल्यार एका गुन्यांवां विशीं न्यायालयांत निमाणो अहवाल सादर करून बंद केला. 44 प्रकरणांची म्हायती आयोगा कडेन सादर केल्या.

* तातूंतले पांच गुन्यांव म्हापशें पुलीस स्टेशनार, जाल्यार दोन गुन्यांव पणजी पुलीस स्टेशना कडेन वर्ग केल्यात. ह्या वर्सा फाटल्या स म्हयन्यांत एसआयटीन चार गुन्यांव दाखल केल्यात. ह्या सगल्या गुन्यांवांचो तपास एसआयटी करता.