भांगरभूंय | प्रतिनिधी
न्हावेली फणसवाडी हांगा वीज वाहिन्यो तुटल्यो
न्हावेली फणसवाडी हांगा वीज वाहिन्यो तुटल्यो
दुकानदारांक अर्थीक फटको
वाळपय: खंडीत वीज पुरवणेची समस्या वाळपय आनी गांवगिऱ्या वाठाराक भेडसावंक लागल्यात. फाटल्या एका म्हयन्या सावन सेगीत वीज पुरवण खंडीत जावंक लागल्या. हाचो विपरीत परिणाम सत्तरी म्हालांतल्या उदका पुरवणेचेर जातना दिसून येता. फाटल्या 24 वरांत 15 वरां वीज पुरवण खंडीत जावपाचो प्रकार घडला. हाका लागून दाबोस उदका प्रकल्पाचेर हाचो परिणाम जाला. फुडले दोन दीस सत्तरी म्हालांत खूबशे कडेन उदकाचो उणाव जावपाची शक्यताय आसा.
मजगतीं, खंडीत वीज पुरवणेक लागून वाळपय आनी गांवगिऱ्या वाठारांतल्या दुकानदारांचेर हाचो परिणाम जावन तांचें व्हड प्रमाणांत लुकसाण जालां. फणसवाडी न्हावेली हांगा वीज वाहिन्यो तुटिल्ल्यान हाचो विपरीत परिणाम सत्तरी म्हालांतल्या उदका पुरवणेचेर जाल्ल्याचें स्पश्ट जालां.
वाळपयचे वीज कचेरेन सत्तरी म्हालांतल्या खूबशा सुवातांनी आयतारा वीज पुरवण खंडीत केल्ली. वीज वाहिन्यांची दुरुस्ती आनी जंय सामकी अत्यावश्यक दुरुस्तीची गरज आसा हीं कामां आयतारा हातांत घेतिल्ली. हाका लागून सकाळीं 8 वरां सावन वीज पुरवण खंडीत केल्ली, ती सांजवेळा 5 वरांचेर सुरळीत जाली.
पूण सोमारा मध्यान रातीं दोन वरांच्या सुमाराक परतून एकदां वीज पुरवण खंडीत जावपाचो प्रकार घडलो. सदर वीज पुरवण सोमारा सांजवेळा पांच वरांच्या सुमाराक सुरळीत जाली. हाका लागून 15 वरां वीज पुरवण खंडीत जावपाचो प्रकार घडलो.
मेळिल्ले म्हायती प्रमाण फणसवाडी न्हावेली हांगा 33 केव्ही तांकीच्यो वीज वाहिन्यो तुटिल्ल्यान वीज पुरवण खंडीत जावपाचो प्रकार घडलो. थंय रस्त्याचें रुंदीकरणाचें काम सुरू आसा. ह्या वेळार रुंदीकरण करतना रस्तो खणिल्लो. हें खणपाचें काम विजेच्या खांब्या कुशीक केल्ल्यान सोमारा मध्यान रातीं खूबशे खांब आडवे जाले आनी वीज वाहिन्यो तुटल्यो. हाका लागून वीज पुरवण खंडीत जाली.
15 वरां वीज पुरवण खंडीत
हे विशींची म्हायती मेळ्ळे उपरांत फांतोडेर 3 वरांच्या सुमाराक वीज वाहिन्याचे दुरुस्तीचें काम हातांत घेतलें. पूण ही वीज वाहिनी चड तांकीची आशिल्ल्यान दुरुस्तीचें काम पुराय जावपाक बरोच वेळ लागलो. सुमार स खांबे मोडिल्ले. खूबशो सरयो तुटिल्ल्यो. हाका लागून सोमारा दीसभर दुरुस्तीचें काम हातांत घेतलें. सांजवेळा पांच वरांच्या सुमाराक वीज पुरवण सुरळीत जाली. हाका लागून सुमार 15 वरां वीज पुरवण खंडीत जावपाचो प्रकार घडलो.
दाबोस उदका प्रकल्पाची यंत्रणा बंद
मजगतीं, आयतारा शट डावन घेतिल्ल्यान दाबोस उदका प्रकल्प बंद केल्लो. सांजवेळा 5 वरांचेर वीज पुरवण सुरळीत जाले उपरांत कांय वरांनी प्रकल्प चालू केलो. पूण रातीं उसरां परतून एकदां वीज पुरवण खंडीत जाल्ल्यान प्रकल्पाची यंत्रणा बंद पडली. सोमारा सकाळीं आठ वरां सावन वीज पुरवण खंडीत जाल्ली ती सांजवेळा 5 वरांचेर सुरळीत जाले उपरांत प्रकल्प सुरू केलो. हाका लागून खूबशा वाठारांनी उदका पुरवण करपी उदका वाहिन्यो रित्यो जाल्ल्यो. ह्या उदका वाहिन्यांतल्यान उदका पुरवण सुरळीत जावपाची आसत जाल्यार सुमार 24 वरां लागतात. हाका लागून सत्तरी म्हाल, वाळपय विभाग आनी गांवगिऱ्या वाठारांनी मंगळारा आनी बुधवारा दनपार मेरेन उदका पुरवणेचो उणाव जाणवतलो अशी शक्यताय आसा.
दुकानदारांचें लुकसाण
खंडीत जावपी वीज पुरवणेक लागून खूबशा जाणांक अर्थीक फटको बसूंक लागला. आठ दिसां पयलीं 21 वरां वीज पुरवण खंडीत जाल्ली. परतून एकदां 15 वरां वीज पुरवण खंडीत जावपाचो प्रकार घडलो. हाका लागून वाळपय शारांतलो आनी गांवगिऱ्या वाठारांतल्या दुकानदाराचेर हाचो परिणाम जालो. दुकानदारांचें दुदाचें आनी दुदजन्य पदार्थांचे व्हड प्रमाणांत लुकसाण जालां. तशेंच आयस्क्रिमाचेंय लुकसाण जालां. हाका लागून खूबशा दुकानदारांक अर्थीक फटको बसला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
