भांगरभूंय | प्रतिनिधी
सुभाष शिरोडकार: बांद बांदपाचें काम डिसेंबर 2024 मेरेन जातलें पुराय
पणजी: उदकास्रोत खात्यान राज्यांतलो उदका सांठो वाडोवपा खातीर डिसेंबर 2024 मेरेन नवे शंभर बांद बांदपाचो निर्णय घेतला. हें काम बेगीनूच सुरू जातलें, अशें उदकास्रोत मंत्री सुभाष शिरोडकार हांणी समारा पत्रकारां कडेन उलयतना स्पश्ट केलें.
राज्यांत दर वर्सा उदकाचो उणाव जाणवल्ल्यान उदक साठोवन दवरपा खातीर चडांत चड बांद बांदपाची गरज आसा. ताका लागून 2024 वर्सा उदकास्रोत खात्यान आनीक शंभर बांद बांदपाचो निर्णय घेतला. हें काम बेगीनूच सुरू जातलें आनी तें डिसेंबर 2024 मेरेन पुराय जातलें, अशें मंत्री शिरोडकार हांणी सांगलें.
अरबी दर्यांत तयार जाल्ल्या बिपरजॉय चक्रीवादळाक लागून अंदूं जूनाच्या निमाणे कडेन पावस गोंयांत आयलो. उपरांत धा दिसांनी पावसान राज्याक फाट केली. ताका लागून राज्यांतल्या सगल्या स धरणांनी उदकाचो सांठो उणो जालो. ह्या काळांत अंजुणे आनी पंचवाडी हीं दोन धरणां सुकपाक पाविल्लीं. पूण 22 जूना सावन पावसान नेट धरिल्ल्यान उदकाचो सांठो वाडलो. गिमाच्या दिसांनी लेगीत खासा करून उत्तर गोंयच्या लोकांक उदकाचे बरेच त्रास सोंसचे पडटात. हो प्रस्न सोडोवपा खातीर राज्यांत आनीक बांद बांदपाची गरज आशिल्ल्याचें मंत्री शिरोडकार हांणी पयलीं म्हणिल्लें. ते प्रमाण आतां उदका स्रोत खात्यान शंबर नवे बांद बांदपाचो निर्णय घेतला अशें तांणी जाहीर केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
