भांगरभूंय | प्रतिनिधी
राज्यांत निर्माण जातले संवसारीक दर्जाचे संशोधक
भांगरभूंय । प्रतिनिधी
पणजी: नव्या राष्ट्रीय शिक्षण धोरणाच्या (एनईपी 2020) प्रमाण संवसारीक दर्ज्याची शिक्षण वेवस्था तयार करपा खातीर उर्बेभरीत सभावाचे आनी सक्षम शिक्षक तयार जावपाक जाय. ही गरज वळखून उच्च शिक्षण संचालनालयान गोंय विद्यापिठांतल्या कार्यावळी खाला गोंयांतल्या 433 प्राध्यापकांक तांचें संशोधन वाडोवपाक आनी विद्यार्थ्यांक तांचे पदवी पांवड्याचेर संशोधन प्रकल्पांतल्यान गुंतोवपा खातीर प्रशिक्षण दिलें.
ही कार्यावळ गोंय स्टेट हायर एज्युकेशन कावंन्सील, गोंय स्टेट रिसर्च फावंडेशन आनी गोंय विद्यापीठ हांच्या जोड पालवान उच्च शिक्षण संचालनालया वरवीं हालींच ‘एनहंसिंग फायनल इयर स्टुडंट प्रोजेक्ट्स’ ह्या विशयाचेर फॅकल्टी डेव्हलपमेंट प्रोग्रामा खाला आयोजीत केल्ली. हातूंत पुराय राज्यांतल्या पीएच. डी नाशिल्ल्या, पूण पुराय वेळ सेवेंत आशिल्ल्या प्राध्यापकांक प्रशिक्षण दिलें.
थळाव्या पूण जागतीक संबंदीत आशिल्ल्या संशोधन समस्यांची वळख करप, संवसारभर वापरिल्ल्या डेटा विश्लेशणा खातीर अत्याधुनीक साधनां आपणावप आनी व्हड पंगडांत काम करतना सहकार्यान संशोधनाक चालना दिवप, एनईपीची नदर पुराय करपी संवसारीक दर्ज्याच्या संशोधनाक विद्यार्थ्यांक तयार करप हो ह्या प्रशिक्षणा फाटलो हेत आशिल्लो.
तज्ञांचें मार्गदर्शन
आयआयटी गोंय, बिट्स गोंय, दिल्ली विद्यापीठ, गोंय विद्यापीठ, गोंय राज्य उच्च शिक्षण परिशद आनी गोवा राज्य संशोधन फावंडेशनांत तज्ञां वांगडा नामनेच्या संस्थांच्या नामनेच्या तज्ञांनी हे कार्यावळींत मार्गदर्शन केलें. तातूंत प्रा. शरद सिन्हा, प्रा. के. ए. गीता, प्रा. ए. के. मिश्रा, प्रा. रीना चेरुयवलथ, प्रा. पूजा गोयल, डॉ. एव्हेलिनो डिकोस्टा, डॉ. नारायण परब, डॉ. अपर्णा लोलयेंकार, प्रा. विठ्ठल तिळवी, प्रा. नियान मार्शेन, डॉ. महेश माजीक आनी प्रा. एम. के. जनार्थनम हांचो आसपाव आशिल्लो.
राज्यांतलें हें पयलेंच फॅकल्टी संशोधन प्रशिक्षण जावन आसा. जंय 34 उच्च शिक्षणीक संस्थांतल्यान 433 प्राध्यापकांक 34 विवीध विशयांनी, संगीत, नाटकांपसून कायदो आनी शिक्षणा मेरेन, अंडरग्रेजुएटांत संशोधन करपा खातीर प्रशिक्षीत करता, अशें गोवा स्टेट रिसर्च फावंडेशनाचे अध्यक्ष प्रा. जनार्थनम हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
