भांगरभूंय | प्रतिनिधी
150 गुंडांची वळेरीय तयार
नवी दिल्ली : उत्तर भारतांतले बंदखणींत आशिल्ल्या 10 ते 12 गुंडांक अंदमान आनी निकोबार बंदखणींत धाडपाची मागणी राष्ट्रीय तपास संस्थेन (NIA) मंत्रालयाक केल्या. ह्या विशयाचेर गृह मंत्रालयाचे अधिकारी आनी एनआयएच्या अधिकार्यां मदीं बरोच तेंप चर्चा चलताली.
एनआयएन वेंचून काडिल्ल्या कांय खर गुन्यांव केल्ल्यांक अंदमान आनी निकोबार बंदखणींत बदली करपाक गृह मंत्रालयाच्या अधिकार्यांक सांगलां. अंदमान आनी निकोबार हांगा बंदखण खूब खर मानतात. ताका ‘काळ्या उदकाची ख्यास्त’ अशेंय म्हण्टात.
दिल्ली, पंजाब, हरयाणा आनी उत्तर प्रदेशांतल्या सुमार 150 गुंडांची वळेरीय प्रशासनान तयार केल्या. हे वळेरेंत लॉरेन्स बिश्रोई सोडून मुखेल गुंड हकीम बाबा चेनू, कौशल चौधरी, अमरीक हे दिल्ली, पंजाब आनी हरयाणाचे बंदखणींत बंद आसात. हाचे पयलीं एनआयएन ह्या गुंडांक दक्षीण भारतांतल्या राज्यांनी स्थानांतरीत करपाचो सल्लो दिल्लो.
सुरवातेच्या प्रस्तावांत भारतांतल्या गुंडांक दक्षीण भारतांतले बंदखणींत हालोवपाचें आशिल्लें, पूण राज्य सरकारा कडल्यान परवानगी घेवची पडटली. ही प्रक्रिया बरीच व्हड आसा. अंदमान आनी निकोबार हो केंद्रशासीत प्रदेश आनी हे अवस्थेंत ह्या गुंडांक थंय हालोवपा खातीर केंद्राक कोणाचीच वेगळी मान्यताय घेवची पडची ना, अशें गृह मंत्रालयांतल्या सुत्रांनी सांगलें.
दुसरे वटेन दिल्लींतल्यान पळून गेल्लो गुंड कपिल उर्फ नंदू आनी लंडनांत आशिल्लो बिश्रोई आनी अमेरिकेंत आशिल्लो बिश्रोईचो भाव अनमोल बिश्रोई एक जावन कट रचतात अशें बिश्रोई आनी नेहरा हांणी सांगलें. बिश्रोई आनी नेहरा हांची चवकशी केल्या उपरांत दिल्ली पुलिसांनी दिल्लींतल्या भाजपा फुडार्यांच्या खून प्रकरणांत एका मनशाक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
