भांगरभूंय | प्रतिनिधी
हवामान आनी हेर कारणांक लागून टमाटाची पुरवण विस्कळीत: रोहीत कुमार सिंह
नवी दिल्ली : ‘उत्पादक केंद्रां कडल्यान’ टमाटांची पुरवण वाडिल्ल्यान फुडल्या 15 दिसांनी टमाटाचें दर देंवून सामान्य पातळेचेर परत येवपाची शक्यताय केंद्र सरकारान उक्तायल्या. जायत्या व्हड शारांनी दरेका घरांत वापरपी भाजयेचें दर 100 रुपया किलो परस फुडें गेल्यात..
हिमाचल प्रदेशांतल्या सोलन आनी सिरमौर जिल्ह्यांतल्यान बरी पुरवण जाल्यार टमाटांचें दर रोखडेंच सकयल देंवतले. दर वर्सा ह्याच काळांत टमाटांचें दर वाडटात. दर देशांतल्यान शेतांत लागवड केल्ल्यो गजाली त्या त्या हंगामी चक्रांतल्यान वता. जुनांत हाचो दर बरोच वयर सरता. हवामान आनी हेर कारणांक लागून टमाटाची पुरवण विस्कळीत जाल्ल्याचें गिरायक, वेव्हार विभागाचे सचीव रोहीत कुमार सिंह हांणी सांगलें.
टमाटां चड काळ सांठोवंक मेळना आनी तीं व्हड अंतराचेर व्हरूंक मेळना. जून- ऑगस्ट आनी ऑक्टोबर- नोव्हेंबर ह्या काळांत टमाटांचें उत्पादन उणें आसता आनी ह्या काळांत सादारणपणान दर खूब वाडटा. 29 जुनाक भारतांत टमाटाचो दर 49 रुपया आशिल्लो, जाल्यार वर्सा आदीं त्याच दिसा टमाटाचो दर किलोक 51.50 रुपया आशिल्लो. पूण ह्या दराचें आपूण समर्थन करिना तशेंच तेंको दिना अशें रोहीत कुमार सिंह हांणी फुडें सांगलें.
गिरायक वेव्हार विभागाच्या आंकडेवारी प्रमाण, 30 जुनाक टमाटाची किंमत 56.58 रुपया किलो आशिल्ली. टमाटांची किंमत दिल्लींत 80 रुपया किलो, मुंबय (48 रुपया), कोलकाता (105 रुपया किलो) आनी चेन्नय (88 रुपया किलो) आसा. तशेंच बंगळुरूंत टमाटाचें दर किलो 54 रुपया, भोपाळ आनी लखनव 100 रुपया किलो, शिमलाक 80 रुपया किलो, भुवनेश्वरांत 98 रुपया किलो आनी रायपुरांत 99 रुपया किलो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
