‘रोजगार तुमच्या दारांत’ मोहीम चड गरजेची

भांगरभूंय | प्रतिनिधी

धंदो- वेवसाय उच्च आनी नोकरेची प्रतिश्ठा उणी ही मानसिकताय भौसांत रिगली जाल्यार बेरोजगारीचो प्रस्न व्हडा पांवड्यार सुटावो जातलो. शासनान ते खातीर यत्न करचे.

देशभरच्या बेरोजगारीचें ‘दी सेंटर फॉर मोनिटरींग इंडियन इकॉनोमी’ ही खाजगी अभ्यास यंत्रणा सातत्यान संशोधन करता. हे संदर्भांतलो नियाळ नेमान प्रसिद्ध जाता. हालींच उजवाडाक आयिल्ल्या नियाळाक धरून फेब्रुवारी म्हयन्याचो विचार केलो जाल्यार गोंयचो बेरोजगारी दर 11.12 टक्के इतलो आसा. पुराय देशाच्या 7.45 ह्या टक्केवारी कडेन तुळा केल्यार तो चड आशिल्ल्याचें फाटल्या लांब काळांत दिसून आयलां.
गोंयची बेरोजगारी उणी जावची देखून शासन विंगड विंगड तरांनी यत्न करता. पूण, ते यत्न एक तर उणे पडटात वा प्रभावीपणान चालीक लागनात. शिक्षीत तरनाटे आनी उद्देगीक आस्थापनां हांकां एकाच व्यासपिठार हाडून तांचो मेळ घडोवपाचो यत्न गोंय सरकारचें रोजगार खातें करता. उद्देगीक आस्थापनांची मनीसबळाची गरज आनी तरनाट्यांची शिक्षणीक तशेंच हेर पात्रताय हांचो मेळ घालून तांतूंतल्यान कांय जाणांक नोकरी मेळची आनी रोजगाराचो प्रस्न उणो जावचो हो सरकाराचो हेतू आसता.
8 नोव्हेंबर 2022 दिसा गोंय सरकारान असोच एक मेळावो ताळगांवच्या श्यामाप्रसाद मुखर्जी स्टॅडियमार आयोजीत केल्लो. हिसपा भायर केल्ल्या खर्चाक लोगून हो मेळावो सद्याक गाजता. म्हायती तंत्रज्ञान, पर्यटन आनी आदरातिथ्य, म्हाल येरादारी, बॅंकींग फायनान्स, विमो, उत्पादन, मार्केटींग आदी क्षेत्रांतलीं उद्देगीक आस्थापनां ह्या मेळाव्यांत वांटेकार जाल्लीं. ह्या मेळाव्यांतल्यान सुमार पांच हजार बेरोजगारांक नोकऱ्यो मेळटल्यो, अशें मुख्यमंत्र्यांचें म्हणणें आशिल्लें. ते खातीर सुमार विशेक हजार बेकार तरनाट्यांनी ह्या मेळाव्या खातीर नांव नोंदणी केल्ली. प्रत्यक्षांत हजारभर लेगीत तरनाट्यांक ह्या मेळाव्यांतल्यान रोजगार मेळूंक पावलो ना, ही वस्तुस्थिती. मराठींत ‘डोंगर पोखरून उंदीर निघाला’ अशी एक म्हणणी आसा. कांय शेकड्यांनी बेरोजगारांक नोकरी मेळपा खातीर सरकारान योग्य नियोजन आनी प्रामाणीक भुमिका हांच्या उणावाक लागून कोट्यांनी रुपयांचो इबाड केलो.
गोंयची बेरोजगारी उणी करतलो जाल्यार सरकाराक एके वटेन नोकऱ्यो जाल्यार दुसरे वटेन समांतर धंदे- वेवसायां खातीर तरनाट्यांची मानसिकताय तयार करची पडटली. ते नदरेन येवजणो आंखच्यो पडटल्यो. गोंय स्वयंपूर्ण करपाचो आपलो हावेस आमचे मुख्यमंत्री डॉ. प्रमोद सावंत सदांच उक्तायत आसतात. ह्या वर्साच्या अर्थसंकल्पांतय ताणी ते खातीर अर्थीक तजवीज केल्ली आसा. गोंय स्वंयपूर्ण जातलें जाल्यार तरनाट्यांक आमी ‘जॉब सिकर’ न्हय तर ‘जॉब गिवर’ करचे पडटले. ते खातीर सरकाराचे प्रामाणीक यत्न गरजेचे आसात. कसल्या उद्देग- धंद्यांक फुडाराक वाव आसा ताचो अभ्यास बेकार तरनाटे, तांचे पालक आनी शासनाच्या संबंधीत अधिकाऱ्यांनी करचो पडटलो. ते खातीर स्वरोजगाराक उत्तेजन दिवपी विंगड विंगड येवजणो आंखच्यो पडटल्यो. खेरीतपणान बायलांक अर्थीक नदरेन सक्षम करचे नदरेन घर उद्देग वाडीक लावपाची गरज आसा. घरउद्देग आनी लघू उद्देगा संदर्भांत तरनाट्यांक जागृत करपाची गरज आसा. तांकां सबसिडी आनी उण्या कळंतराचें रीण मेळपाची तजवीज करपाक जाय. सद्याक ज्यो येवजणो चालंत आसात त्यो सुटसुटीत करच्यो पडटल्यो.
गोंयकारां कडेन उद्देजीकतायेक लागपी मानसिकतायेचो उणाव आसा. ही मानसिकताय शिक्षणाचे वरवीं विद्यार्थी जिणेंत शाळेंत आनी घरांतच तयार जावप भोव गरजेचें. आमच्या अभ्यासक्रमांत हालींसरा कुशळतायेक बळगें दिवपी कांय विशयांचो आस्पाव जाला खरो, पूण ताची कार्यवाही प्रभावीवणान जायना ही वस्तुस्थिती. गोंयचे विद्यार्थी पुस्तकी विशय शिकून पदवी मेळोवपांत धन्यताय मानतात. भुरग्यां मदीं प्रयोगशीलताय तयार करपी विशय आमच्या अभ्यासक्रमांत उणे आसात. सरकारान आयटीआय सारख्या संस्थां वरवीं स्वरोजगाराक चालना दिवपी वेव्हारीक स्वरुपाचे वेवसायीक अभ्यासक्रम विद्यार्थी स्विकारतले हाचे खातीर यत्न करपाक जाय. ते खातीर तांकां उर्बा दिवपाक जाय. भोवतेक परंपरीक धंदे- वेवसायां कडेन गोंयकार तरनाट्यांनी फाट केल्ल्यान आयज ते परप्रांतीयांच्या हातांत गेल्यात. गोंयकार तरनाट्यांक ते आपणावपाचे नदरेन प्रोत्साहीत करपाक जाय.
कोवीडाच्या काळांत साबार जाणांच्यो नोकऱ्यो गेल्यो. ह्या काळांत कांय तरनाटे शेती करपा कडेन आकर्शीत जाले. पूण ह्याय मळार सरकारी येवजणो जाय त्या प्रमाणांत तरनाट्यांक प्रेरीत करपाक उण्यो पडल्यो. देखून आयज दोन वर्सां उपरांत गोंयांत शेती आनी शेतकारांच्या संख्येंत वाड जाल्या ती नांवां पुरती अशें दिसून येता.
‘सरकार तुमच्या दारी’ हे येवजणे खाला गोंय शासन दर एका म्हालांत पयश्यांची खातड करून फेस्तां करता. ह्या उपक्रमा खाला ‘रोजगार तुमच्या दारांत’ सारखी येवजण सरकारान तयार करपाक जाय. रोजगार सल्लागार केद्रां आनी बेकारांक वेवसाय मार्गदर्शन केंद्रांची स्थापना दरेका म्हालांत स्थापन करपाक जाय. गोंयाक सैमाचें व्हड देणें लाबिल्लें आसा. उदेंतेक दोंगर आनी अस्तमतेक दर्या साबार रोजगारांचो स्रोत जावपाक शकता. गोंयांत पर्यटनाक धरून अजून कितलेशेच घरउद्देग तयार करप शक्य आसा. देखीक गोंयांत आयिल्ल्या पर्यटकाक गोंयची याद म्हूण आपल्या घरा परतून वतना व्हरपा सारखी कसली वस्त आमचे कडेन तयार जाता?
नव्या राश्ट्रीय शिक्षणीक धोरणांत वेवसायीक आनी कौशल्याचेर आदारीत शिक्षणाक खूब वाव आसा. ताचो फायदो तरनाट्यांक जातलो जाल्यार शिक्षणा कडेन निगडीत सगल्या घटकांनी स्वता तो आदीं सारखो समजून घेवचो पडटलो. धंदो वा वेवसाय करता ताका आपल्या परिश्रमान आनी प्रामाणीकपणान तो तरातराक व्हरपाची संद आसता. नोकरेंत पगाराची वाड मर्यादीत आसता. पालकांक आपल्या भुरग्यांनी सुगूर पगाराची नोकरी करची अशें दिसता. पूण ताणीं जोखीम घेवन धंदो वा वेवसाय करचो अशें तांकां दिसना. आतां पालकांनी आपली मानसिकताय बदलून आपल्या भुरग्यांक स्वावलंबी जावचे नदरेन तयार करचे पडटले.
स्वयंपूर्ण समाजाची बुनयाद शिक्षणांत आसा. धंदो- वेवसाय उच्च आनी नोकरेची प्रतिश्ठा उणी ही मानसिकताय भौसांत रिगली जाल्यार बेरोजगारीचो प्रस्न व्हडा पांवड्यार सुटावो जातलो. शासनान ते खातीर यत्न करचे. तशें करपाक कोट्यांनी रुपया मोडपाची गरज ना. जाय तें योग्य नियोजन आनी प्रभावीपणान चालीक लावपाची वृत्ती.

अनंत अग्नी
9422439903