भांगरभूंय | प्रतिनिधी
म्हापशें: कळंगूटे गोंयांतली सगल्यांत जाण्टी बायल मातिल्डा डिसोझा उर्फ मॅटी हांचो 111वो वाडदीस 25 ऑक्टोबराक व्हड दबाज्यान मनयलो.
वाडदिसा निमतान आमदार मायकल लोबो, सरपंच जोजफ सिक्वेरा, पंचायत मंडळ तशेंच कळंगूटचे पुलीस निरिक्षक दत्तगुरू सावंत हांणी आपल्या वांगड्यां सयत तांच्या घरा वचून डिसाेझा हांची भेट घेतली आनी तांकां वाडदिसाच्यो शुभेत्सा दिल्यो.
3 नोव्हेंबर 2021 दिसा पिरायेच्या 112व्या वर्सा लॉर्डिना कॉन्सेकाओ लोबो हांच्या मरणा उपरांत मातिल्डा डिसोझा ही गोंयांतली सगल्यांत जाण्टी पिरायेची व्यक्ती जाल्या. मॅटी ह्या टोपण नांवान वळखीची आशिल्ली मातिल्डा डिसोझा हांचो जल्म 25 ऑक्टोबर 1911 दिसा जाल्लो. मातिल्डा डिसोझा 1973 वर्सा कळंगूटच्या सोयसाटी ऑफ सेंट व्हिन्सेंट डी पॉलच्याे पयल्यो अध्यक्ष जाल्ल्यो.
कळंगूट पुलिसांचे भेटी वेळार तांणी श्रीमती मॅटी हांणी विशेश संदेश दिवन तांकां शुभेत्सा दिल्यो. सगल्या लोकांची काळजी घेयात आनी तांचे खातीर बऱ्यो गजाली करात असो संदेश तांणी पुलिसांक दिलो. ह्या वेळार पुलीस निरिक्षक दत्तरगुरू सावंत हांणी तांचो संदेश लक्षांत दवरून पाळो दिवपाचें आस्वासन दिलें.
ज्येश्ठ नागरिकां कडेन संपर्क सादपाचो एक भाग म्हूण पुलिसांनी मातिल्डा डिसोझा हांच्या घरा ही सदिच्छा भेट दिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
