भांगरभूंय | प्रतिनिधी
टीएमसीच्या दडपशायेचो अंत : दामू नायक
पणजी: अस्तंत बंगालांत ममता बॅनर्जी हांची सरकारांत जी दडपशाय चलताली ताचो अंत जाला. प्रधानमंत्री नरेंद्र मोदी, गृहमंत्री अमीत शहा आनी असंख्य कार्यकर्त्यांच्या सेगीत येत्नाक लागून अस्तंत बंगालांत भाजपाक येस मेळ्ळां. आतां उदरगतीची गंगा अस्तंत बंगालाक व्हांवपाक लागतली. भाजपाचे संस्थापक श्यामाप्रसाद मुखर्जी हांचे भुंयेंत तांच्या विचारांचें सरकार आयलां, हाची खोशी जाता, अशें प्रदेश भाजप अध्यक्ष दामू नायक हांणी म्हणलां.
स्वामी विवेकानंद, गुरूदेव रवींद्रनाथ टागोर, सुभाषचंद्र भोस हांचे सारक्या युगपुरूशांचे जल्मभूंयेर भारतीय जनता पक्षाची सत्ता येवप ही खोशयेची गजाल आसा. प्रधानमंत्री नरेंद्र मोदी हांचे नेतृत्व, कार्यकर्त्यांचे परिश्रम आनी देशांत सुरू आशिल्ल्या उदरगतीचो हो परिणाम आसा, अशें राज्यसभेचे खासदार सदानंद शेट तानावडे हांणी म्हणलां.
केरळ सोडून अस्तंत बंगाल, आसाम, पुडुचेरी हांगाय भाजपाक येस मेळ्ळां. प्रधानमंत्री नरेंद्र मोदी, गृहमंत्री अमित शहा, अध्यक्ष नितीन नबीन हांणी बंगाल पिंजून काडलो. हाका लागून पयलेच खेपो अस्तंत बंगालांत भाजपाक येस मेळ्ळां. भारतीय जनता पक्षाच्या सरकारावेलो विस्वास दिसान दीस वाडत आसा, अशें बांदकाम खात्याचे मंत्री दिगंबर कामत हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
