भांगरभूंय | प्रतिनिधी
इंडियन प्रिमियर लिगेंत (आयपीएल) आदलो वस्ताद मुंबय इंडियन्सान लखनौ सुपर जायण्ट्साक 6 विकेटींनी हारायलो. लखनौन दिल्ले 229 धांवड्यांचे मोखीचो फाटलाव मुंबय इंडियन्सान 18.4 ओव्हरींनी 4 विकेटी व्हगडावन मेळयलो.
मुंबयन तीन हारी उपरांत पयलें जैत जोडलें. दुखापतींतल्यान बरो जावन येवपी रोहित शर्मा आनी रायन रिकल्टन हांणी पयले विकेटी खातीर फक्त 65 बॉलांनी 143 धांवड्यांची भागिदारी करून जैताचें मुळावण घालें.
ते आदी टॉस हारल्या उपरांत पयली बॅटींग करतना लखनौ सुपर जायण्ट्सान निकोलस पुरनाच्या (63) अर्द शेंकड्या नेटार आनी मिशेल मार्शच्या 44 धांवड्यां नेटार निर्धारीत 20 ओव्हरींनी 5 विकेटी व्हगडावन 228 धांवड्यो केल्यो.
मार्शाक जोश इंग्लीसाच्या रुपान नवो ओपनींग पार्टनर मेळ्ळो. दोगांयनी बरी सुरवात केली. पूण, इंग्लीस 13 धांवड्यो करून बाद जालो. अंदूंच्या हांगामांत पयले खेपे तिसरे सुवातेर आयिल्ल्या पुरनान फक्त 16 बॉलांनी अर्द शेंकड्याची आक्रमक खेळी केली. 8.1 ओव्हरींनी लखनौन 1 विकेट व्हगडावन 123 मेरेन मजल मारिल्ली. मुंबय इंडियन्स बॅकफुटाचेर पाविल्लो. पुरन आनी मार्श हांची 94 धांवड्यांची भागिदारी अखेरेक कॉर्बिन बॉशान फोडली. एके ओव्हरींत दोनूय बॅट्समनांक ताणें बाद केले. पुरनान 21 बॉलांनी एक चवको आनी आठ सक्यांचे मजतीन 63 धांवड्यो केल्यो. मार्शान 25 बॉलांनी चार चवके आनी तीन सक्यांचे मजतीन 44 धांवड्यो केल्यो.
ते दोगूय बाद जाल्ल्यान धांवगतीचेर ब्रेक लावपाक मुंबय येसस्वी थारलो. 13वे ओव्हरींत लखनौन 5 विकेटी व्हगडावन 160 धांवड्यो केल्ल्यो. त्या वेळार हिम्मत आनी मार्करम हांणी डाव सांबाळ्ळो. दोगांयनी सुरवातीक सावकाश बॅटींग केली. पूण, स्पिनरांच्या कांय ओव्हरींनी तांणी चड धांवड्यो करपाक येस मेळयलें. पूण, मुंबय इंडियन्सान अखेरच्यो कांय ओव्हरी बऱ्यो घाल्यो. चाहरान अचूक यॉर्कर घाले आनी बुमरान आपले विवीधतायेचो उपेग केलो. ताका लागून हिम्मत आनी मार्करमाक निमाण्या तीन ओव्हरींनी फक्त 22 धांवड्यो करपाक शक्य जाल्यो. मार्करमान 25 बॉलांनी 31 धांवड्यो केल्यो. हातूंत एक चवको आनी एक सको आशिल्लो. हिम्मत हाणें 31 बॉलांनी 40 धांवड्यांचें योगदान दिलें. ताणें दोन चवके आनी दोन सके मारले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
