भांगरभूंय | प्रतिनिधी
फरारी जाल्ल्या दुसऱ्या दुबाविताक अटक करपाक पुलिसांक येस
फोंडें: खाजोड्डें- बोरये आयतारा सांजवेळा दीपक राया नायक (58) हांचो कुराडीन गळ्यार हल्लो करून खून केल्ल्या प्रकरणांत फोंडें पुलिसांनी साईदीप कुशन नायक हाका रातीं उसरां अटक केल्ली. अटक केल्ल्या साईदीप कुशन नायक हाका सोमारा न्यायालयांत हजर करतकूच न्यायालयान ताका 10 दिसांची पुलीस कोठी दिल्या. खून केले उपरांत फरार जाल्लो गौरेश कुशन नायक हाका सोमारा सांजवेळा अटक करपाक फोंडें पुलिसांक येस आयलें. फोंडें पुलीस स्टेशनाचे उपअधिक्षक शिवराम वायंगणकार आनी निरिक्षक मोहन गावडे ह्या प्रकरणाचो अदीक तपास करतात.
आयतारा सांजवेळा दीपक नायक हांचो जमनीच्या वादांतल्यान खून केल्लो. कुराडीन पयलीं तकलेर आनी उपरांत गळ्यार हल्लो केले उपरांत गौरेश कुशन नायक हो फरार जाल्लो. फोंडें पुलिसांनी दीपक नायक हांच्या खून प्रकरणांत साईदीप कुशन नायक हाका आयतारा रातींच अटक केल्ली. जाल्यार फरार जाल्लो गौरेश कुशन नायक हाचो सोद पुलीस घेताले. सोमारा सांजवेळा गौरेश नायक हाका अटक केली. पुलिसांनी अटक केल्ले दोगूय दुबावीत दीपक नायक हांच्या बापोलभावाची भुरगीं आसात.
मजगतीं, सोमारा सकाळीं दीपक नायक हांचे कुडीची मरणा उपरांतची तपासणी केली. उपरांत दनपारां कूड घरच्यांचे सुवादीन केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
