वैभव सूर्यवंशी : भारतीय क्रिकेटीचो फुडार

भांगरभूंय | प्रतिनिधी

आयपीएल म्हणल्यार रत्नांची खण अशें म्हणटात. कारण दर वर्सा आयपीएलांत अशें एक रत्न उदेता आनी ताका लागून पुराय क्रिकेट जगार उजवाड फांकता. अशाच एका उदेत्या रत्नान फक्त भारतीय क्रिकेटूच न्हय जाल्यार पुराय क्रिकेट मळार आपलें नांव कोरांतलां, आनी ताचें नांव जावन आसा वैभव सूर्यवंशी. ताची पिराय फक्त 15 वर्सां. सद्या आयपीएलांत वैभव सूर्यवंशीन सगल्यांचें लक्ष ओडून घेतलां. मूळ बिहारचो वैभव सूर्यवंशी हो फक्त 15 वर्सां पिरायेचो तरणाटो खेळगडो. फाटल्या वर्सा ज्या वेळार राजस्थान रॉयल्स पंगडान ताचेर 1 कोटी 10 लाखांची पावणी मारून ताका आपल्या पंगडांन घेतलो त्याच वेळार ताची चर्चा सुरू जाली. राजस्थान रॉयल्स पंगडान ह्या 14 वर्सांच्या भुरग्याचेर इतली व्हड पावणी कित्याक मारली असो प्रस्न क्रिकेट मळार विचारलो. ताची जाप सोदपा खातीर मात्शें फाटीं वच्चें पडटलें. वैभव सूर्यवंशीन 12 व्याच वर्सा बिहारा कडल्यान 19 वर्सा पिराये खालच्या पंगडांतल्यान विणू मंकड करंड क्रिकेट सर्तींत वांटो घेतलो आनी थंय ताणें बरी कामगिरी केल्ल्यान ताची निवड बिहारच्या रणजी पंगडांत जाली. बिहारा कडल्यान रणजी खेळपी तो सगल्यांत उणें पिरायेचो खेळगडो थारलो.
13 व्या वर्सा वैभवान विजय हजारे करंडांत धांवड्यांचो पावस घालो. ताका लागून ताची भारताच्या 19 वर्सा पिराये खालच्या ब पंगडांत निवड जाली. 4 पंगडांनी वांटो घेतिल्ले हे सर्तींत ताणें 6 डावांत 177 धांवड्यो काडल्यो. तातूंत ताणें दोन अर्दशेंकडे मारले. ताका लागून ऑस्ट्रेलिये आड भारताच्या 19 वर्सां पिराये खालच्या मुखेल पंगडांत ताची निवड जाली. 19 वर्सा पिराये खालच्या टॅस्टींतल्या पदार्पणाचे मॅचींत ताणें फक्त 58 बॉलांनी शेंकडो मारलो. त्या वेळार ताची पिराय 13 वर्सांची आशिल्ली.
18 वर्सा पिराये खालच्या आशिया कप सर्तींत जाल्यार ताणें खवदळ घालो. थंय यूएई आड ताणें 46 बॉलांनी 76 धांवड्यो काडल्यो जाल्यार सेमी फायनलींत श्रीलंके आड 36 बॉलांनी 67 धांवड्यो काडल्यो. हे सर्ती सावन ताची सगली कडेन चर्चा जावंक लागली. ही चर्चा राजस्थान रॉयल्स पंगडाच्या पदाधिकाऱ्यांक समजली. तांणी तांचो बॅटिंग कोच आशिल्लो विक्रम राठोडाक वैभव सूर्यवंशीची बॅटिंग पळोवंक सांगलें. राठोडान वैभवाची बॅटिंग पळयली आनी ताका आपल्या पंगडांत घेवपाचें निश्चीत केलें. तांचो मुखेल कोच आशिल्लो राहुल द्रवीड. हो तर नव्या खेळगड्यांक संद दिवपाक फामाद आसा. ताणें लेगीत वैभावाची बॅटिंग पळयली आनी ताका संद दिवपाचें थारायलें आनी अशे तरेन ताचो राजस्थान रॉयल्स पंगडांत आस्पाव जालो.
आयपीएल सुरू जाली पूण सुरवेच्या कांय मॅचींनी वैभवाक संद मेळ्ळी ना. लखनौ पंगडा आड राजस्थान रॉयल्सान ताका पयले फावटी संद दिली. वैभव हेच संदीची वाट पळयतालो. ताणें हे संदीचें भांगर करपाचें थारायलें, आनी पयल्याच बॉलार शार्दुल ठाकूरा सारक्या अणभवी बॉलराक मुखार सरून सको मारलो आनी सगल्यांक अजापीत केलें. हे मॅचींत ताणें 20 बॉलांनी 34 धांवड्यो काडून आपल्या आयपीएल कारकिर्दीची नेटान सुरवात केली. दुसरे मॅचितूय ताणें बरी कामगिरी केली. गुजराता आड ताणें फक्त 38 बॉलांनी 101 धांवड्यो काडल्यो. ह्या शेंकड्या बराबर ताणें खूबशे विक्रम मोडले. तो आयपीएल सर्तींत सगल्यांत उणें पिरायेचो शेंकडो मारपी खेळगडो थारलो. इतलेंच न्हय जाल्यार सगल्यांत उण्या बॉलांनी शेंकडो मारपी भारतीय खेळगडो थारलो. फक्त आयपीएलूच न्हय जाल्यार टी 20 क्रिकेट इतिहासांत सगल्यांत उणें बॉल खेळून शेंकडो मारपी सगल्यांत उणें पिरायेचो खेळगडो थारलो. ताणें फक्त 36 बॉलांनी शेंकडो मारून युसूफ पठाणाचो विक्रम मोडलो. एका मॅचींत सगल्यांत चड सके हुबोवपाचो विक्रमूय ताणें आपल्या नांवार केला.
फाटल्या वर्सा आयपीएल गाजयिल्ल्या वैभवान ह्या वर्सा जाल्यार सगल्यांत अजापीत करून खूबशे विक्रम आपल्या नांवार केले. ह्या वर्साय ताणें 36 बॉलांनी शेंकडो मारून इतिहास रचलो. आयपीएलांत दोन शेंकडे आनी दोनूय 36 बॉलांनी मारून तो एकसुरो खेळगडो थारलो. पिरायेच्या 15 व्या वर्सा आयपीएलांत दोन शेंकडे मारपीय तो एकसुरो खेळगडो आसा. फक्त आयपीलांतूच न्हय जाल्यार फाटल्या वर्सा जाल्ल्या 19 वर्सा पिराये सकयल्या टी 20 सर्तिंतूय ताणें बरी कामगिरी केली. ताचे बरे कामगिरीन भारतान संवसारीक करंड आपल्या नांवार केल्लो. आयपील आसूं वा राष्ट्रीय, आंतरराष्ट्रीय क्रिकेट, खंयचेय सर्तींत तो जितले निर्भीडपणान खेळटा तितल्या निर्भीडपणान खेळपी खूब उणें खेळगडे क्रिकेट मळार आसात. जसप्रीत बुमरा, ट्रेंट बोल्ट, राशीद खान, जोश हेजलवूड, मिचेल स्टार्क, पॅट कमिन्स ह्या सारक्या संवसारांतल्या नामनेच्या बॉलरांक तो जे तरेन सके हुबयता तें पळोवन अजाप दिसता. फक्त 15 वर्सा पिरायेच्या ह्या खेळगड्याच्या मोगांत क्रिकेट विश्व पडलां. सचिन तेंडुलकर, राहुल द्रवीड, पॅट कमिन्स, अ‍ॅडम गिलख्रिस्ट, वासीम अक्रम, सुनील गावस्कर, श्रीकांत, अनिल कुंबळे, हरभजन सिंग, नवज्योत सिंग सिद्धू, महेंद्र सिंग धोनी ह्या सारक्या नामनेच्या खेळगड्यांनी ताची तोखणाय केल्या.
क्रिकेटीचो देव सचिन तेंडुलकर जाल्यार ताच्या मोगांतूच पडला. सचिन तेंडुलकरान वैभवाच्या खेळा विशीं ट्विट केलां की, वैभवाची निडर शैली, उत्कृश्ट बॅट स्पीड, बॉलाची लांबाय रोखडोच वळखुपाची तांक आनी बॉला फाटल्यान शक्त लावपाची तयारी ह्या सगल्यांचो संगम म्हणल्यार वैभवाचो खवदळ घालपी खेळ. फक्त सचिन तेंडुलकरूच न्हय जाल्यार संवसारांतल्या नामनेच्या खेळगड्यांनीय ताच्या बॅटिंगे विशीं तोखणाय केल्या. फक्त खेळगडेच न्हय जाल्यार क्रिकेट मोगींनीय ताचेर तोखणायेचो शिंवर घाला. क्रिकेट मोगींनी ताच्या खेळाचे व्हिडियो, फोटू सोशल मिडियाचेर पोस्ट करून ताचेर तोखणायेचो शिंवर घाला. मिडिया जाल्यार ताचेर फिदाच जाल्या. ताच्या खेळान ताणें आपूण भारतीय क्रिकेटीचो फुडार आसा हें दाखोवन दिलां. भुरग्याचे पांय पाळण्यांत दिसतात हे म्हणी प्रमाण ताणें ल्हान पिरायेंतूच आपूण कोण जातलों हें दाखोवन दिलां. ताचे हे खवदळ घालपी बॅटिंगेक लागून ताची नामना तेंगशेर पावल्या. वैभवान मात हाचे कडेन आडनदर करून खेळाचेर लक्ष केंद्रीत करूंक जाय. ताका आनीक तेंगशेर वचपाचें आसत जाल्यार ताणें हे प्रसिद्धी पसून पयसूच राविल्लें बरें. प्रसिद्धीच्या झगमगाटांत व्हांवत वचून आपल्या करियराची मातेरी करपी खूबशे खेळगडे आमी पळयल्यात. विनोद कांबळी, पृथ्वी शॉ ही ताजीं उदाहरणां आसात. वैभवान आपल्या खेळाचेर लक्ष केंद्रीत करून आनीक कश्ट घेत जाल्यार तो भारतीय क्रिकेटीचो फुडार थारतलो हातूंत दुबाव ना. वैभवाक खूब खूब शुभेत्सा!

श्याम ठाणेदार
9922546295