भांगरभूंय | प्रतिनिधी
डिजिटल मिडियान योग्य आनी अभ्यास करून नवे पिळगे मेरेन म्हायती पावोवची
पणजी : विकसीत भारताचें सपन पुराय करप हें फकत प्रधानमंत्री वा मुख्यमंत्र्याची जापसालदारकी न्हय, ती एक सामुहीक जापसालदारकी. हातूंंत डिजिटल मिडियाचें योगदान गरजेचें. डिजिटल मिडियान योग्य खात्री करपा सारकी आनी अभ्यास करून नवे पिळगे मेरेन म्हायती पावोवची, असो उलो मुख्यमंत्री डॉ. प्रमोद सावंत हांणी मारलो.
डिजिटल मीडिया संपादक पत्रकार संघटणे वतीन आयोजीत कार्यावळींत ते उलयताले. ह्या वेळार समाजकल्याण मंत्री सुभाष फळदेसाय हांचे सयत राजा माने, अनिल पाटील, ओम प्रकाश शेट्ये आनी हेर पदाधिकारी हाजीर आशिल्ले.
मुख्यमंत्र्यान म्हणलें, प्रधानमंत्री नरेंद्र मोदी हांणी देशांत देशात डिजिटल इंडिया मोहिमे वरवीं डिजिटल युगाची सुरूवात केली. भारतांत वर्तमानपत्र, रेडिओ, टीव्ही मिडिया आनी आतां डिजिटल मिडिया अशा स्वरूपांत पत्रकारितेचो प्रवास आसा. कोविडा उपरांत डिजिटल मिडियाचो आनीक प्रसार जालो. सध्याची जनरेशन झी तशेच जनरेशन अल्फा फकत मोबायलाचेर कंटेंट पळयतात. हे पिळगे खातीर डिजिटल मिडयिान म्हायती दिवपी कंटेंट दिवप गरजेचें. एखाद्या विशयाचो खोलायेन अभ्यास करून तो बर्या स्वरूपांत योग्य ग्राफिक्सची मजत घेवन मांडल्यार कन्टेन्ट अदीक लोकां मेरेन पावपाक शकता.
खंयच्याय मळार अधिकारां वांगडा जापसालदार्यायो येतात. डिजिटल मिडिया चड लोकां मेरेन पाविल्ल्यान तांचेर जापसालदारीक अदीक आसा. खंयच्याय मनशाक आपली इमेज करपा खातीर बरींच वर्सां घालोवचीं पडटात. धा वर्सां सोंपूनय आनीक काम करीत रावल्यार राजकारण्यांची इमेज तयार जाता. अशा वेळार एके दुचाकीचे बातमेक लागून ती इमेज पिड्ड्यार जावपाक शकता. हाका लागून डिजिटल मिडियान बातमी दितना ते विशीं पयलीं खात्री करप गरजेचें. अभ्यासपूर्ण आनी योग्य बातमी दिवप हें डिजिटल मिडियाचें कर्तव्य आशिल्ल्याचें मुख्यमंत्र्यांनी सांगलें.
मुख्यमंत्र्यान, डिजिटल पत्रकार संघटणेन कांय मागण्यो केल्यो. आमी गोंय सरकार वतीन ह्यो मागण्यो केंद्रीय म्हायती आनी प्रसारण मंत्री तशेंच पंतप्रधान नरेंद्र मोदी हांचे मेरेन पत्र बरोवन पावयतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
