भांगरभूंय | प्रतिनिधी
गोंयच्या पांचवी ते णववी मेरेनच्या मराठी पुस्तकांत ‘जय महाराष्ट्र’
एससीईआरटीन नियुक्त केल्लें मराठी संपादकीय मंडळ
पणजी : एके वटेन मराठी ही गोंयची भास आसा आनी तिका राजभास म्हूण दर्जो दियात म्हूण मागणी जायत आसा, मात गोंयच्या मराठी साहित्य मळार वेगळेंच चित्र आसा. गोंयच्या शिक्षणीक श्रेत्रांत, मराठी पाठ्यपुस्तकांत तांचें योगदानूच दिसना. गोंय राज्य शिक्षणीक संशोधन आनी प्रशिक्षण मंडळान (एससीईआरटी) अभ्यासक्रम तयार करपा खातीर नेमिल्ल्या मराठी संपादकीय मंडळान गोंयच्या लेखकांक आंवाळो जाल्यार भायल्या लेखकांक कुंवाळो दिवपाचो प्रकार केला. म्हणल्यार, पांचवी ते णववे मेरेनच्या मराठी पाठ्यपुस्तकांत योगदान दिवपी लेखकां मदीं सुमार 80 टक्के लेखक गोंयां भायले आसात.
कांय लेखक अशेंय आसात जांकां तांच्या स्वताच्या राज्यांत चडशें कोण वळखनात. मात, गोंयच्या मराठी अभ्यासक्रमांत तांकां उंचेली सुवात मेळ्ळ्या. अभ्यास मंडळांतल्या जायत्या वांगड्यांनी ‘हांव तुजी फाट थापटतां, तूं म्हजी फाट थापट’ अशें पद्दतीन एकामेकांचे भलायपण करपा खातीर अभ्यासक्रमाचो वापर केल्ल्याचो दिसून येता.
अभ्यासक्रम कांय वर्सांनी एकदांच तयार करतात. गोंया सारक्या राज्यांत, जंय शेंकड्यांनी साहित्यीक वेगवेगळ्या भाशांनी बरयतात, थंय एससीईआरटीच्या मराठी संपादकीय मंडळान गोंयच्या साहित्यिकां कडेन आडनदर करून गोंया भायल्यांक प्राधान्य दिलां, म्हूण पाठ्यपुस्तकां पळयल्यार दिसून येता.
अभ्यासक्रम तयार करपाक कितलेशेच म्हयने लागपाक शकता. नव्या शिक्षणीक धोरणा प्रमाण गोंयांत अभ्यासक्रम तयार केल्लो, पूण गोंयच्या साहित्यिकां कडेन आडनदर करून महाराष्ट्रांतल्या साहित्यिकांक चड म्हत्व दिल्ल्यान गोंयच्या साहित्यिकां मदीं खूब तिडक निर्माण जाल्या. संपादकीय मंडळान पुस्तकांची निर्मणी करतना अशा गजालींचेर विचार करपाक जाय, अशी अपेक्षा आसता. पूण हे प्रक्रियेंत तशें जाल्लें दिसना. दूरदिश्टीचो उणाव, गोंयच्या साहित्यिकां विशीं फावो ती म्हायती नाशिल्ल्यान वा आपल्या वळखीच्यांक संद (लाव) दिवपाचो यत्न केल्ल्यान हें घडूंक शकता, अशी शक्यताय एका ज्येश्ठ लेखकान उक्तायली.
एससीईआरटीन निर्माण केल्ल्या अभ्यास मंडळांतल्या वांगड्यांक गोंयांतल्या लेखकांच्या साहित्या विशीं खबर आसची ना वा तांच्या साहित्या विशीं कांयच देणे-घेणे नासतले, अशें हे अभ्यासक्रम पळयल्यार दिसता. 65 वा ताचे परस चड लेखक गोंय भायले, खास करून महाराष्ट्रांतले आसात. संत साहित्य आनी संवसारांत नाशिल्ल्या कांय ज्येश्ठ लेखकांचे कांय साहित्य अभ्यासक्रमांत आसात. हेर साहित्य पळयल्यार गोंयांतल्या मराठी लेखकांक थारावन कुशीक काडल्यात अशें दिसता. पांचवी ते णववी मेरेनच्या मराठी पुस्तकांत फक्त धा ते पंदरा लेखक मूळ गोंयचे आसात. ह्या पुस्तकांत लेखक आनी कवी हांचे मदीं गोंयच्या लेखकांची टक्केवारी सुमार 20 टक्के आसा.
हीं पुस्तकां पळयल्यार पयल्याच खिणाक तीं महाराष्ट्र राज्य पाठ्यपुस्तक मंडळाचीं पुस्तकां असो भास जाता. पूण तीं गोंय राज्य शिक्षणीक संशोधन आनी प्रशिक्षण मंडळान केल्यात. खाशेली गजाल म्हणल्यार ह्या पुस्तकांचें संपादकीय मंडळूय गोंयचेंच आसा. तरी लेगीत तांकां गोंयांतले लेखक मेळूंक ना हें अजापूच आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
