भांगरभूंय | प्रतिनिधी
सद्याचे परिस्थितींत देशा सयत हेर राज्यांनी ‘पक्ष फोडा आनी राज करा’ असो फॉर्मुला सुरू जाला. कारण फुडल्या संसदेच्या पावसाळी अधिवेशनांत 850 खासदारांच्या विधेयकाक मंजुरी मेळची हे खातीर राज्यसभेंत आनी लोकसभेंत खासदारांची संख्या उणी पडत आसा. ह्याच उद्देशान सरकारान ‘पक्ष फोडा आनी राज करा’ अशी रणनिती आंखिल्ल्याचें स्पश्ट दिसून येता. कारण सरकाराक कल्पना आसा की, देशांतले 75 टक्के परस चड लोकप्रतिनिधींचेर भ्रश्टाचाराचें वा हेर गुन्यांवांचे आरोप आसात. अशा सगल्याच खासदारांचेर सरकाराची नदर आसा. अशा खासदारांक ईडी वा हेर सरकारी यंत्रणेचो धाक दाखोवन सत्ताधारी पक्ष आपल्या पक्षांत वा वेगळो गट तयार करून दरेक विरोधी पक्षांत फूट घालपाचें दबावतंत्र सुरू आसा आनी हें काम फळादीक लेगीत जायत आसा. तेच प्रमाण पक्ष सोडपी लोकप्रतिनिधी म्हणटात की आमी सत्तेंत नाशिल्ल्यान सरकार आमच्या मतदारसंघांनी फावोसो फंड दिना, ताका लागून आमी सत्ताधारी पक्ष वा एनडीएंत वा महायुतींत प्रवेश केला वा करीत आसात.
कांय लोकप्रतिनिधीं कडेन भ्रश्टाचाराच्या माध्यमांतल्यान आडमार्गान जोडिल्ली कोट्यांनी रुपयांची संपत्ती आसा. ताचेर कसलीच कारवाय जावची न्हय म्हणून एनडीएंत वा महायुतींत प्रवेश केल्ल्याचें दिसून येता, आनी कांय लोकप्रतिनिधी कोट्यांनी रुपयांचें दिवप घेवप करून सत्ते वटेन वळटना दिसतात. ही गजाल देशाच्या 140 कोटी लोकांक बरे तरेन खबर आसा. तेच प्रमाण खूबशे लोकप्रतिनिधीं स्वताच्या सुवार्था खातीर पक्षांतर करून नैतिकता, बांदिलकी आनी पक्षा विशींची निश्ठा खुंटयाळ्याक लावन सत्ते वटेन वळिल्ल्याचें दिसून येता, आनी एनडीएंत वा महायुतींत फुटून वचपी 75 टक्के लोकप्रतिनिधी हे काँग्रेसीच्या विचारणीचेच आसात. काँग्रेसीची विचारसरणी एनडीएक वा भाजपाक केन्नाच पटली ना. मागीर सरकारान ह्या 75 टक्के लोकप्रतिनिधींक आपले वटेन कित्याक केलें असोय प्रस्न उप्रासता.
भाजपा पयलीं लेगीत काँग्रेसीक वायट समजताली आनी आयजूय समजता. इतलें सगलें आसून लेगीत फोडाफोडीचें राजकारण करून सरकाराक काँग्रेस विचारसरणीचे लोक कशे कितें चलतात? आयजूय सरकार म्हत्वाचे मुद्दे कुशीक दवरून नेहरू-गांधी हांचेर चिखल उडोवन सेगीत देशांतल्या लोकांक सांगतात की काँग्रेसीन फाटल्या 60 वर्सांत कांयच केलें ना. ही गजाल कितले मेरेन योग्य म्हणपाची! देशान पक्ष-अपक्षांचो काळ पळयला हातूंत अटलबिहारी वाजपेयी, लालकृष्ण अडवाणी, व्ही. पी. सिंग, पी. व्ही. नरसिंहराव, मनमोहनसिंग, चंद्रशेखर, राजीव गांधी आदीं खूबश्या फुडाऱ्यांच्या काळांत पक्ष-अपक्ष समजिकायेन कार्य करताले आनी एकामेकांचे आचार-विचार आदान-प्रदान करताले. पूण सद्याचे परिस्थितींत सरकार विरोधकांची कसलीच गजाल आयकुपाक तयार नाशिल्ल्याचें दिसून येता. हें लोकशायेचे नदरेंतल्यान घातक म्हणचें पडटलें. कारण विरोधी पक्ष फुटून एनडीएंत गेलो तें सरकाराक चलता आनी दुदा भशेन नितळ जातात. पूण विरोधकांनी उखलून धरिल्ले प्रस्न चलनात, ही कसली लोकशाय म्हणपाची! ही सामकी गंभीर गजाल म्हणची पडटली.
पयलीं, रेल्वे, विमान येरादारी, संरक्षण, अर्थ आदीं खूबशा खात्यांनी जर कांय चुकीच्यो घडणुको वा दुर्घटणा घडल्यो जाल्यार संबंदीत विभागाचे मंत्री नैतीक जापसालदारकी स्विकारून स्वता जावन राजिनामो दिताले, वा लोकांची तिडक पळोवन राजिनामो दिताले. पूण सद्याचे परिस्थितींत देशांत नीट पेपर लीक प्रकरण व्हड प्रमाणांत गजालें. हातूंत आतां मेरेन अदमाशेक 20 परस चड विद्यार्थ्यांनी आत्महत्या केली. तरी लेगीत शिक्षण मंत्र्यांनी आपली नैतीक जापसालदारकी स्विकारून अजून मेरेन राजिनामो दिल्लो ना. सरकाराचें म्हणणें आसा की, राजिनामो ही पद्दत आमच्यांत ना, ही कसली लोकशाय! भांगराचें मोल मळबाक तेंकले. म्हारगाय तेंगशेर पावल्या. शेतकारांच्या म्हालाक योग्य तें मोल मेळना. भलायकी सुविधा दिसानदीस सकयल देंवत चल्ल्या. ह्यो सगल्यो म्हत्वाच्यो गजाली सरकाराच्या दोळ्या सामकार आसात. पूण हाचे वेलें लक्ष कुशीक काडपा खातीर देशांत मंदीर, मशीद, हिंदू-मुस्लीम वाद मुखार करून 140 कोटी लोकांची सरकार दिशाभूल करीत आशिल्ल्याचें दिसून येता, आनी ही सत्य परिस्थिती आसा. देशांत खूबशे ज्वलंत आनी गंभीर समस्या आसात. बेरोजगारी, कुपोशण, शेतकारांच्यो आत्महत्या, शिक्षीणीक समस्या, वाडटो भ्रश्टाचार, अत्याचार, वाडटीं रानां मारप, अलनिनोची गंभीर समस्या, पियेवपाच्या उदकाची समस्या, भलायकी, कोट्यांनी रुपयांचें घोटाळे करून खूबशा जाणांनी विदेशांत पळ काडलो, ताचे कडेन सरकाराची आडनदर आसा. अश्यो खूबश्यो गंभीर समस्या 140 कोटी लोकां म्हऱ्यांत उब्यो आसात. तरी लेगीत देशाचे भोळे जनतेक मंदीर-मशीद नांवाचें भूत घालून ह्यो सगल्यो समस्या कुशीक दवरून सत्तेंत आपली पकड घटमूट करपा खातीर देशांत सरकारा कडल्यान फोडाफोडीचें राजकारण सुरू आसा.
सरकारची कट्टर विरोधक ममता बॅनर्जी, तांच्या पक्षाचे आचार-विचार सरकाराक केन्नाच पटले नात. पूण फोडाफोडीच्या राजकारणांतल्यान कांय लोकप्रतिनिधी (खासदार) आपले कडेन करून घेतले ते सरकाराक 100 टक्के चल्लें, ही कसली नितिमत्ता म्हणपाची! सद्याचे परिस्थितींत देशांत उक्तो राजकी बाजार मांडिल्ल्याचें दिसून येता. जणू लोकशाय सोंपत चल्ल्या काय कितें अशें चित्र दिसता. कारण सत्तेच्या हांयसाक लागून खूबशे दिग्गज लोकप्रतिनिधी पक्षांतर करून सत्ते वटेन वळटना दिसून येतात. म्हणजेच विकतात. ह्यो सगल्यो गजाली लोकप्रतिनिधीं कडल्यान कलंकीत करपी आसात. एका काळार दरेक राजकी पक्षांत विचारसरणी, पक्षांची बांदिलकी, पक्षा बराबर एकनिश्ठपणा उरताली. पूण हालींच्या काळांत राजकी वर्तुळांत घोडेबाजाराक मोटो ओतो आयिल्ल्याचें स्पश्टपणान दिसून येता. लोकप्रतिनिधी उक्तेपणान विकतात आनी जो सत्ताधारी पक्ष ज्या विरोधकांचेर भ्रश्टाचाराचे मोटेमोटे आरोप करताले आनी बंदखणींत उडोवपाची भाशा उलयताले त्या सगल्यांकूच सरकार भ्रश्टाचारा विशींची क्लीन चीट दिवन आपल्या पक्षांत आस्पावन घेत आसात. ही तर लोकशायेची फकांडांच म्हणची पडटली. आचार-विचारांत विरोधाभास आसूंक शकता आनी तो आसूंकच जाय. पूण 140 कोटी जनते मुखार लोकप्रतिनिधी विकतात ही 140 कोटी जनतेची फकांडांच म्हणची पडटली. आयचो राजकी फुडारी स्वताच्या सुवार्था खातीर पक्षाची नैतिकता, बांदिलकी, विचारसरणी विसरून सत्ते कडेन धांव घेत आसा हो लोकशाये खातीर मोटो धक्कोच म्हणचो पडटलो. सत्ताधारी पक्षान आपली पकड घटमूट करपा खातीर जणू लोकशाये आड बंड पुकारलां काय कितें अशें दिसता. कारण सद्याच्या सत्ताधाऱ्यांक विरोधकांची विचारसरणी केन्नाच पटली ना आनी पटची लेगीत ना. कारण सरकाराक घटमूट विरोधी पक्ष नाकाच! हे खातीर विरोधी पक्ष सोंपोवन हाडपा खातीर सरकारान फोडाफोडीचें राजकारण सुरू केलां आनी तेच पद्दतीन सरकारा कडल्यान फाटल्या कांय वर्सां सावन देशांत फोडाफोडीचें राजकारण सुरू आसा, आनी हातूंत तांकां व्हड प्रमाणांत येस लेगीत मेळत आसा.
हाचे फाटलो सरकाराचो एकूच उद्देश आसुये तो म्हणल्यार विरोधी पक्ष सोंपोवपाचो. फाटल्या 12 वर्सांनी विरोधकांचो मानसन्मान जातालो. पूण आतां तोडा-फोडा राज करा अशी परिस्थिती सगली कडेन दिसून येता. आयज देशांत सत्ताधाऱ्यां बराबर शेंकड्यांनी भ्रश्टाचारी आसात. एका काळार सत्ताधारी पक्ष जांचेर भ्रश्टाचाराचे आरोप लायताले तेच भ्रश्टाचारी आयज सत्तेंत वांटेकार जावन जापसालदार पदार बसल्यात आनी दुदासारके नितळ जाल्ले दिसतात हाका कसली लोकशाय म्हणपाची! जय हिंद.
रमेश कृष्णराव लांजेवार
9921690779
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
