भांगरभूंय | प्रतिनिधी
पेडणें: गोवा स्टेट व्हर्टिकला वरवीं पुरवण जावपी भाजयांचो सर्जो सामको निकृश्ट दर्जाचो आशिल्ल्याचो गंभीर आरोप करून पेडणेंच्या खुबश्या भाजी विक्रेत्यांनी तिडक उक्तायल्या. ह्या प्रकरणांत व्हर्टिकलचे अध्यक्ष प्रेमानंद शेट तशेंच संबंदीत अधिकार्यांनी बेगोबग हस्तक्षेप करून गुणवत्तापुर्ण भाजीपुरवण सुनिश्चीत करची, अशी मागणी दुकानदारांनी केल्या.
दुकानदारांच्या म्हणण्या प्रमाण, बेळगांवच्या येवपी भाजयांनी व्हडा प्रमाणांत कुशिल्लीं तमाटां, कुशिल्ले बटाट, तशेंच हेर निकृश्ट दर्जाच्या भाययांचो आसपाव आसता. हाका लागून गिरायकां सेगीत कागाळी करीत आसतात. हाचो सरळ फटको थळाव्या विक्रेत्याचेर बसता. गिरायकाची तापसावणी खावची पडिल्ल्यान विक्रेत्यानी तिडक उक्तायल्या.
तशेञच ठेकेदाराक अदीक लाव मेळोवन दिवपा खातीर गांवगिर्या वाठारांतल्या नागरिकांक निकृश्ट दर्जाची भाज दितात काय?, असो प्रस्न गिरायकां विचारतात अशें विक्रेत्यांनी सांगलें. हाका लागून गिरायक आनी विक्रत्यां मदीं वाद निर्माण जाता.
ह्या पुराय प्रकरणाची मुख्यमंत्री डॉ. प्रमोद सावंत हांणी स्वता दखल घेवन व्हर्टिकलचे अध्यक्ष आनी संबंदीत अधिकार्यांकडल्यान वस्तुस्थिती जाणून घेवची. तशेंच दर्जेदार भाजीपुरवणे खातीर बेगोबेग उपाय काडपाची मागणी, गिरायकां आनी दुकानदारांनी केल्या.
मजगतीं, फुडले दात दीस सुधारणा जावंक ना जाल्यार ७ जुलयाक सकाळीं ११ वरांचेर पणजे संबंदीत अधिकार्यांच्या कार्यालया मुखार घेरो घालून आंदोलन करतले अशी शिटकावणी पेडणेंच्या भाजी विक्रेत्यांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
